Нууц мэдээллийн уурхай

Удахгүй болох “Гэгээн Муза” драмын шилдэг бүтээл, шилдэг уран бүтээлч шалгаруулдаг энэхүү наадам энэ сарын 27-нд шилдэгүүдээ шалгаруулах гэж байгаа билээ. Энэ удаагийн “Гэгээн муза” наадамд шилдэг эрэгтэй гол  дүрийн номинацид  нэр дэвшиж байгаа “Мөрөөдлийн театр”-ын захирал жүжигчин Эрхэмбаяртай цөөн хором ярилцсанаа хүргэе.
-"Гэгээн Муза" наадмын шилдэг эрэгтэй гол дүр номинацид нэр дэвшиж байгаа энэ талаараа сонирхуулахгүй юу?
-Уншигчиддаа болон нууц.мн сайтын хамт олонд театрын өдрийн мэнд хүргэе.Энэ сарын 27-нд шилдгүүдээ тодруулах “Гэгээн Муза” наадам болно.Манай “Мөрөөдлийн театр"ын хувьд бол үнэхээр том баяр болох гэж байна. Алтаншагай бид хоёрын хувьд драмын театр хэмээх том айлаас өрх тусгаарлан гарсан байгаа. "Мөрөөдлийн театр" маань байгууллагдаад нэг жил болж байгаа бас драмын театрын хувьд отгон хүү нь ч гэж болохоор маш азтай. Нэг насныхаа ойн дээр энэхүү нэр хүндтэй наадамд оролцох боломжтой болсондоо бахархаж л байна. Шилдэг эрэгтэй гол дүр дээр МУАЖ Мягмарнаран, МУАЖ Цэрэндавга хэмээх мундаг хүмүүстэй өрсөлдөнө гэдэг маш том амжилт бөгөөд аз завшаан хэмээн бодож байна.
-Мөрөөдлийн театрын цаашдын уран бүтээлийн талаар?
-Драмын жүжгээс гадна дэлгэцийн бүтээлд хүчээ сорихоор эхний уран бүтээлийнхээ ажилд ороод эхэлчихсэн байна. “Ээжийн дайсан” хэмээх нэртэй бүтээлээрээ ирэх тавдугаар сард сургууль төгсөгчиддөө зориулан инээдмийн жүжиг тавихаар зохиол дээрээ ажиллаж байгаа .  
-Мөрөөдлийн театр цаашид яг ямар сэдвээр уран бүтээлээ хийх вэ?
-Яг бол драм гэхгүй дэлгэцийн болон бүх төрөл жанрт хүчээ үзнэ. Жүжигчдын уран чадварын хувьд ч гэсэн боломжийн чадварлаг баг команд байгаа учир баригдмал байхгүйг хичээж байна.Драмын болон, хошин урлагт ч хүч сориж магадгүй. Гайхалтай сайхнаас гадна хүний сэтгэлд хүрсэн ,нийгэмд болохгүй байгаа сэдвийг барьж тэрхүү бүтээлээрээ бас үзэгчидэд нэгийг бодогдуулахаар бүтээлүүд хийнэ дээ. Уран бүтээлч хүмүүс өөрсдийнхөө хийж байгаа зүйлээр залуучуудыг уриалан дуудах түүчээ нь байх ёстой гэж бодож явдаг.
-Сүүлийн үед хүүхдийн уран бүтээл ховордож байгаа.Энэ тал дээр Мөрөөдлийн театр хүүхдэд зориулсан уран бүтээл хийх үү?
-Цаашид хийх уран бүтээлийн маань төлөвлөгөөнд бас орчихсон явж байгаа.Одоогийн энэ нийгэмд хүүхдийн уран бүтээл маш ховор байгаад бас сэтгэл эмзэглэж явдаг. Бид бүхний ирээдүй болсон хүүхэд багачуудаа "Мөрөөдлийн Театр"ын ах эгч нар нь мартахгүй ээ. Та бүгддээ зориулж гайхалтай  уран бүтээлүүд хийх болно гэдгээ энэ дашрамд бас хэлье. Бид Дэлхийн зөн хэмээх байгууллагатай хамтран ажиллахаар төсөл боловсруулсан байгаа. "Мөрөөдлийн Театр" байгуулагдахаас өмнө өнгөрсөн жил "6-р сард зочилсон Өвлийн өвгөн” нэртэй  тоглолт хүүхдийн баярын өдрөөр хийж байсан. Энэ тоглолт маань хүүхдүүдийн сэтгэлд хүрч чадсан тоглолт болсон гэж найдаж байгаа. Ирэх жил ч мөн иймэрхүү тоглолт хийнэ.
-Удахгүй болох “Гэгээн Муза”-д амжилт хүсье. Үргэлж шинэ бүхнээр үзэгчдийнхээ оюуныг цэнгүүлж байгаарай?
-Баярлалаа удахгүй болох “Гэгээн Муза” наадамд оролцох бүх уран бүтээлчиддээ амжилттай оролцоорой гэж нууц.мн сайтаар дамжуулан хэлье. Танай хамт олонд ажлын өндөр амжилт хүсье.

баярлалаа

Ярилцсан Н.АСРАЛТ NUUTS.MN