Нууц мэдээллийн уурхай

...Магсарынх Ууганбаяр, Мөнхбаяр, Отгонбаяр гэсэн гурван хүүтэй. Хөвгүүд том залуу болсон ч бүгд гэр бүлгүй. Бага хүү Отгонбаяр эхнэр авах хүсэлтээ илэрхийлснийхээ хариуд ааваасаа алганы амт хүртэж, хоёр ах нь гэрлэсний дараа эхнэр авах тухай ярьж болох сануулга авдаг. Отгонбаярын хувьд үүнийг хүлээнэ гэдэг бүтэшгүй зүйл байв. Ялангуяа ажил гэр гэсээр хүнтэй ч танилцахгүй шинжтэй том ах Ууганбаяр нь түүний санааг түгшээдэг. Ингээд хоёр дүү нь ахдаа эхнэр хайж эхэлнэ...

Энэ бол саяхан нээлтээ хийсэн “National Film” продакшны бүтээл, найруулагч Д.Ханьсагийн “Миний ахын эхнэр” инээдмийн, уянгын уран сайхны кино байв. Кино зохиолыг Ж.Баярбаатар, Д.Амараа нар хамтран бичжээ. Кино урлагт анхны дүрээ бүтээсэн гол дүрийн эмэгтэй жүжигчин С.Болорбайгалтай ярилцлаа.
 
-Анхны уран бүтээлээ өлгийдөн авсанд баяр хүргэе. Өөрийгөө танилцуулаач?
-МУИС-ийн гадаад харилцааны сургуулийг төгссөн. Одоо бизнесийн чиглэлээр ажиллаж байна. Миний хувьд энэ кино анхны бүрэн хэмжээний уран сайхны кино төдийгүй урлагийн анхны алхам болсон. Надад итгэл үзүүлж сонгосон киноныхоо хамт олонд хамгаас их баярласнаа илэрхийлье. Хамгийн гол нь намайг санал болгож, кинонд хөтлөн оруулсан найз Батзаяадаа баярлалаа. Хэцүү зүйл олон байсан ч кино багийнхан маань зааж сургаад, дэмжээд тоглуулсан.
-Үзэгчдийн дунд суугаад өөрийгөө харж байхдаа догдолж байв уу?
-Би киногоо дэлгэцэнд гартал үзээгүй байсан. Найруулагчид маань нээлтийн өдөр үз гэсэн юм. Би өөрөө ч амжихгүй явсаар үзэгчидтэйгээ хамт үзлээ. Кино ямар болсныг үзэгчид шүүх байх. Миний хувьд кино үнэхээр сайн болжээ. Мэргэжлийн жүжигчин биш учир өөрийгөө шүүж, дүн тавилаа. Зарим нэг үзэгдэл дээр өөрийнхөө хүссэн хэмжээнд тоглож чадаагүй юм шиг санагдсан. Ерөнхийдөө кино мэргэжлийн мундаг жүжигчидтэй байсан болохоор миний алдааг дараад, нуугаад тоглосон байна лээ.
-Сургуульд нь сураагүй, мэргэжлийн бус хүнд кинонд тоглох хэцүү байсан уу. Тоглох санал хүлээж аваад өөртөө хэр итгэлтэй байв?
-Киноны талаар ямар ч ойлголтгүй болохоор анх сонсоод өөртөө итгээгүй. Гэхдээ кино пробонд ороод тэнцсэн гэдгээ сонсоод тоглоод үзье гэж сэтгэл шулуудсан. Маш олон мэргэжлийн мэргэжлийн бус охид, бүсгүйчүүд шалгуулсан гэсэн. Хүмүүс надад итгэл хүлээлгэж байхад би ямар ч байсан ажлыг нь унагааж болохгүй гээд өөрийн чадах чинээгээрээ хичээсэн.
-Найз чинь яагаад чамайг энэ дүрд тоглооч гэсэн юм бол. Золзаяа чамтай юугаараа төстэй байсан бэ? 
-Би амьдрал дээрээ хөгжилтэй, нийтэч хүн. Гэхдээ эрэгтэй хүнтэй харилцах тал дээр хатуу байдгийг найз Батзаяа маань анзаарсан юм шиг билээ. Тиймээс Золзаяагийн дүртэй төстэй учир тоглуулъя гэж бодсон байх. Намайг энэ дүрийг бүтээхдээ өөрийнхөөрөө л байхад болно гэсэн болохоор амар байсан. Өөрөөсөө эсрэг дүрийг гаргах гэж өөрийгөө ч, өрөөлийг ч зовоох шаардлагагүй нь надад давуу тал болсон.
-Кино урлаг олон хүний хүч хөдөлмөрөөр бүтдэг. Зураг авалтын үед шантрах үе байв уу?
-Киноны 30-40 хувийн зураг авалт эхэлсэн үед намайг сонгосон юм билээ. Ерөнхийдөө миний дүр үлдсэн байсан. Зураг авалтыг сар гаруйн хугацаанд хийсэн. Дараа нь ямар их ажил байдгийг, ямар олон хүний хүч хөдөлмөр ордгийг мэдэрсэн дээ. Тиймээс өнөөдөр кино маань бэлэн болчихоод үзэгчиддээ өргөн барьж байгаад баяртай байна.
-Зохиолын тухайд ямар бодолтой байна. Таалагдаагүй, өөрчилсөн хэсэг бий юу?
-Зохиол их сайхан санагдсан. Нийгмийн гайгүй төвшний залуучуудын өдөр тутмын амьдрал, хайр сэтгэлийн тухай хөгжилтэй, адал явдалтайгаар харуулсан учир таалагдсан. Зохиолыг би мэдэж өөрчилнө гэж байхгүй л дээ. Гэхдээ жижиг, сажиг зүйл дээр эмэгтэй хүн ийм байвал зүгээр юм уу, тэгж хэлвэл дээр юм уу гэж өөрийнхөө санааг хэлнэ. Найруулагчид миний саналыг хүлээж авна, заримдаа “Чиний рэйтинг унах гээд байна уу” гээд шоолно. Тэгээд саналаа илүү сайн гаргах гэж хичээж тоглосон.

-Кинонд тоглосноос хойш чиний үзэл бодол, амьдралд ямар өөрчлөлт гарав?
-Надад мэдрэгдэж байгаа зүйл гэвэл урлаг гэдэг ямар хэцүү, нөр их хөдөлмөр юм бэ гэдгийг ойлгосон. Найз нөхдөдөө хэлээгүй байсан болохоор тэдэнд гэнэтийн бэлэг болсон. Гэр бүл, найз нөхөд маань харин намайг өөрөөр хараад байх шиг. Нөгөө хатуу ширүүн, шударга хүн жүжигчин болчихсон уу гэж гайхаж байна. Би жүжигчин биш. Намайг тэгж дуудах хэрэггүй шүү гэж сануулсаар байгаа.
-Анхны дүрдээ тоглолоо. Цаашид мэргэжлээ өөрчилж, урлагийн салбарт орох бодол байна уу?
-Надад тийм бодол огт байхгүй. Одоо эрхэлж буй ажлын хувьд маш хариуцлагатай үе миний амьдралд ирж байна. Тиймээс дааж авсан ажлаа сайн хийхээр чармайж байна. Урлаг бол хүн бүрийн хүсэл мөрөөдөл байдаг шүү дээ. Би их азтай хүн. Залуу насаа дэлгэцийн бүтээлд мөнхөлж үлдээж байгаадаа баяртай байна. Урлагийн салбарт орно, жүжигчин болно гэж хүсдэггүй байсан хүний хувьд энэ бол маш том мөрөөдлөө биелүүлсэн явдал болсон. Хэдэн жилийн дараа ажил амьдрал цэгцрээд ирэхээр ахиад нэг кинонд тоглоё гэж бодох ч юм билүү. /инээв.сур/

-Бүтээсэн дүрээрээ залууст юу хэлэхийг хүссэн бэ?
-Одоо Монголын нийгэм хэцүү байгаа шүү дээ. Тиймээс манай кино гэгээлэг өнгөлөг бүхнийг харуулсан. Ах дүүсийн харилцаа, хайр дурлал, гэр бүлийн хүмүүжил, аав ээжийн хүндлэл гэж юу болох, эмэгтэй хүн өөрийгөө хайрлах, үнэ цэнэтэй, хэмжүүртэй, бусдыг хайрлах, энэрэх сэтгэлтэй байх ёстой шүү дээ. Амьдралд асуудал зөндөө бий. Залуус бие биедээ хайртай хэр нь өдөр тутмын ажил, амьдралдаа сатаарч өөрсдөдөө цаг зав гаргахгүй байна. Тиймээс хайртай хүмүүстээ цаг зав гаргаж байгаасай гэж хэлэхийг хүссэн.

Б.Ундрал NUUTS.mn™