Монгол Улсын харьяат 272 хүүхэд гадаадын иргэнд үрчлүүлжээ
Нийтэлсэн: 2020-10-15 23:18:37
Өнөөдрийн байдлаар 1999 оноос хойш 272 хүүхдийг 17 орны гадаадын иргэн, гэр бүлд үрчлүүлээд байна. Үүнээс АНУ-д 156, Германд 36, Италид 22, Францад 20, Нидерландын Вант Улсад 7, Өмнөд Солонгост 6, бусад улсад 25 хүүхэд үрчлэгджээ.
НҮБ-ын “Хүүхдийн эрхийн тухай” конвенцод заасны дагуу 2 буюу 3 талт гэрээг үрчлэгч эцэг, эх, эрх бүхий төрийн бус байгууллагатай байгуулдаг. Гэрээнд заасны дагуу үрчлэгч эцэг, эх хүүхдийг хэвийн өсөж бойжиж байгаа талаар тайланг 1 сартайгаас 3 нас хүртэл хагас жил тутам, 4-8 нас хүртэл жил тутам, 9-16 нас хүртэл хоёр жил тутам Гадаадын иргэн харьяатын газарт ирүүлдэг ажээ.
Монгол Улсын харьяат хүүхдийг гадаадын иргэн гэр бүлд үрчлүүлэхдээ НҮБ-ын “Хүүхдийн эрхийн тухай” конвенц, “Хүүхдийг хамгаалах ба улс хооронд үрчлэх асуудлаар хамтран ажиллах тухай” Гаагийн конвенц, Монгол улсын гэр бүлийн тухай хуулийг мөрдлөг болгодог байна. Монгол Улс “Хүүхдийг хамгаалах ба улс хооронд үрчлэх асуудлаар хамтран ажиллах тухай” Гаагийн конвенцод 1998 онд нэгдэн оржээ.
Мөн 2010 оны Гадаадын иргэний эрх зүйн байдлын тухай, Хууль зүй, дотоод хэргийн сайд, Нийгмийн хамгаалал, хөдөлмөрийн сайдын хамтарсан 2001 оны 100/32 дугаар тушаалаар батлагдсан “Гадаадын иргэнд Монгол Улсын харьяат хүүхдийг үрчлүүлэх журам, түүнчлэн Гадаадын иргэн, харьяатын газрын даргын 2010 оны А/396 дугаар тушаалаар баталсан “Монгол Улсын харьяат хүүхдийг үрчлэх хүсэлт гаргасан гадаадын иргэнтэй ярилцлага хийх журам”-ыг дагаж хүүхдийг үрчлүүлдэг тухай Гадаадын иргэн харьяатын газраас мэдээлэв.
