9 дүгээр сарын 1-нд 30 сургууль, 45 цэцэрлэг хүүхдүүддээ хүлээн авна
ургалтын үйл ажиллагааны бэлтгэл ажил бүрэн хангагдсан эсэх талаар Боловсрол, шинжлэх ухааны яамнаас өнөөдөр (2020.08.31) мэдээллээ.
Улсын хэмжээнд 30 сургууль, 45 цэцэрлэгийн өргөтгөл барилгын ажил дуусч, есдүгээр сарын 1-нд хүүхэд багачуудаа хүлээн авахад бэлэн болжээ. Мөн улсын төсвийн хөрөнгө оруулалтаар 140 сургуулийн барилгын өргөтгөлийн ажил үргэлжилж байгаа аж. Энэ онд багтаан 31 сургууль, 41 цэцэрлэг ашиглалтад оруулахаар төлөвлөсөн гэж БШУЯ-ны Хөрөнгө оруулалтын газрын дарга Ч.Энх-Амгалан хэллээ. Тэрбээр “2020-2021 оны хичээлийн жилд сургуульд суралцах хүүхдийн суудлын тоо 14 мянга орчмоор нэмэгдсэн. Цэцэрлэгийн орны тоо зургаан мянгаар нэмэгдсэн байна. Улсын хэмжээнд 171 цэцэрлэг барихаар төлөвлөснөөс өнөөдрийн байдлаар 45 нь ашиглалтад ороод байна. Ойрын гурван жилд багтаан цэцэрлэг, сургуулийн өргөтгөл барилгын ажлыг дуусгаж, ашиглалтад оруулна. Хичээлийн шинэ жил эхлэхтэй холбоотойгоор бэлтгэл ажлын хүрээнд сургууль, цэцэрлэгийн 104 барилгад засвар хийж, 92 хувийн биелэлттэй байна. Өнөөдрийн байдлаар улсын хэмжээнд 35 сургууль, 26 цэцэрлэг, 8 дотуур байрны засвар дууссан. Нийт 17 барилгын ажлын засварыг 2021 онд шилжүүллээ. Мөн есдүгээр сарын эхний хоёр долоо хоногт 14 барилгын ажлыг дуусгахаар төлөвлөж байна” гэлээ. Хичээлийн шинэ жилийн бэлтгэл ажлын хүрээнд сургууль, цэцэрлэгт ариутгал халдваргүйжүүлэлт хийж буй бөгөөд санхүүжилтийг нь орон нутгийн нөөц хөрөнгөөс гаргаж байгаа аж. Эрүүл ахуйн дэглэм сахих бэлтгэл ажлыг сүүлийн гурван долоо хоногт хангаж дуусчээ. Цаашид сургууль, цэцэрлэгүүдэд ариутгал халдваргүйжүүлэлтийг тогтмол хийх талаар БШУЯ-наас Сангийн яамтай хамтран ажиллахаар болсон байна.
