ОХУ-д оршин сууж байгаа монгол иргэд, оюутнуудын анхааралд
Нийтэлсэн: 2020-04-14 00:30:47
Өөрийгөө тусгаарлах буюу Москва хотод тогтоогоод байгаа хорио цээрийн дэглэмийн үед иргэдийн хөдөлгөөнийг зохицуулах пропуск /цахим зөвшөөрөл/-ийн системийн журам, зааврыг Москва хотын Засгийн газрын албан ёсны цахим хуудсан дээр нийтэлсэн байна.
2020 оны 4 дүгээр сарын 15-ны өдрөөс эхлэн иргэд Москва хот, Москва мужид хувийн болон албаны эсвэл нийтийн тээврээр зорчихын тулд цахим зөвшөөрлийг урьдчилан авсан байх шаардлагатай гэж дурдсан байна.
Хувийн, албаны эсвэл нийтийн тээврээр хотын эргэн тойронд зорчихдоо цахим зөвшөөрөлтэй байх эсвэл хүчин төгөлдөр албан ёсны үнэмлэх (цэргийн албан хаагч, төрийн болон хотын ажилтан, төрийн болон хотын албан тушаал хашиж байгаа хүмүүсийн үнэмлэх, шүүгч, хуульч, нотариатын үнэмлэх, сэтгүүлч, байгууллагын хамгаалалтын албаны үнэмлэх гэх мэт)-тэй байх ёстой. Харин явган зорчигчдод цахим зөвшөөрөл одоогоор шаардахгүй юм байна.
Москва хот болон Москва мужид ОХУ-ын бусад бүс нутгуудаас ирж байгаа иргэдэд энэхүү журам адил үйлчлэх юм байна.
Цахим зөвшөөрөл нь үндсэн 3 хэлбэрээр олгогдоно. Үүнд:
- Ажлын шаардлагын улмаас олгогдох зөвшөөрөл. Энэ нь хязгаарлалтын хугацаанд буюу 4 дүгээр сарын 30-ний өдөр хүртэл хугацаагаар олгогдоно.
- Зөвхөн эмнэлэг, амбулаторид үйлчлүүлэх зорилгоор олгогдох зөвшөөрөл. Энэ зөвшөөрлийг өдөрт 1 удаа олгох боловч долоо хоногтоо хэдэн удаа ч авч болох юм байна.
- Бусад зорилгоор буюу хүнсний дэлгүүр, зах явах, зуслан, галт тэрэгний буудал явах зэрэг хувийн зорилгоор зөвшөөрөл авах. Энэхүү зөвшөөрлийг 1 өдрийн хугацаатай олгох бөгөөд долоо хоногт 2 удаа л олгоно.
Хувийн машинаар зорчих өргөдөл гаргахдаа тээврийн хэрэгслийн улсын дугаарыг харин нийтийн тээврээр зорчих тохиолдолд Тройка эсвэл Стрелка төлбөрийн картын дугаарыг бичих ёстойг анхааруулсан байна.
Нэг удаагийн зөвшөөрлийг олгохдоо оршин суугаа газрын хаяг, очих газрын хаягийг зааж өгөх шаардлагатай болно.
Хэрэв тухайн хүн Москвад амьдарч байгаа боловч өөр бүс нутагт байнгын бүртгэлтэй бол нийслэл дэх бодит оршин суугаа хаягаа зааж өгөх хэрэгтэй болно гэж онцолжээ.
МОНГОЛ УЛСААС ОХУ-Д СУУГАА ЭЛЧИН САЙДЫН ЯАМ
