ӨНӨӨДӨР МОНГОЛ, ОХУ-ЫН БАГ ТАМИРЧИД ГАРААНД ГАРНА
Нийтэлсэн: 2019-08-05 01:58:25
"Цэргийнхэн дайн тулааны талбарт бус харин тэмцээн уралдааны талбарт авхаалж самбаа, тэсвэр хатуужил, мэргэжлийн ур чадвараа сорьж өрсөлдөх ёстой" гэсэн энх тайванч үзэл санаан дор олон улс орнуудыг эгнээндээ нэгтгэсэн "Олон улсын цэргийн наадам" манай улс оролцогч орноос зохион байгуулагч улс болон нэгдэж, "Аравт" олон улсын морин цэргийн уралдааныг Монгол Улс зохион байгуулж байна.
Уралдаан цэргийн алба хаагчийн бэлтгэл сургуулилт, ур чадвар, тэсвэр хатуужлыг сорих алсын зайн морин маршид Казахстан, Киргизийн баг тамирчид гараанд гарахаас эхэлсэн бол өнөөдөр Монгол, ОХУ-ын баг тамирчид уралдааны замд гарна. Монгол, ОХУ-ын баг тамирчид гараанаас хоёр цагийн зайтай гарах бөгөөд энэ цаг үед ЗХЖШ-ын Сургалтын хэлтсийн Биеийн тамир, спортын тасгийн мэргэжилтэн, дэд хурандаа Ч.Мөнхтүшиг дасгалжуулагчтай Монгол Улсын баг тамирчид гараанаас гарахад бэлэн боллоо. Баг тамирчдыг "Аравт" уралдаан зохион байгуулах хорооны дарга, хошууч генерал Ж.Бадамбазар тэргүүтэй удирдлагууд гаргаж өгнө.
