Эрүүл мэндийн бичгээ хуурамчаар үйлдсэн “KFC”-ын хоёр ажилтанд Зөрчлийн хэрэг нээжээ
Нийтэлсэн: 2019-02-19 01:14:11
Хан-Уул дүүргийн 11 дүгээр хороонд байрлах “Таван богд фүүдс” ХХК-ийн Зайсан “KFC” салбарт гарсан хоолны газраар үйлчлүүлсэн иргэд хоолны хордлогод орсон талаарх мэдээлэл олон нийтийн анхаарлын төвд байна. Өнөөдрийн байдлаар тус газарт хоёрдугаар сарын 8-15-ны өдрүүдэд хоол идсэн 116 хүнд өвчин үүсгэгч нян илэрсэн. ХӨСҮТ-д хэвтэн эмчлүүлж байгаа 37, гэрээр эмчийн зөвлөгөөний дагуу эмчлүүлж байгаа 79 хүнд хоолны хордлогот халдварын ижил эмнэлзүйн шинж тэмдэг илэрчээ. Уг хордлогын улмаас өнгөрсөн хугацаанд нийт 242 хүнд эмнэл зүйн шинж илэрч, 42 хүн эмнэлэгт хэвтэн эмчлүүлж байгаа билээ.
Үүний дагуу мэргэжлийн хяналтын газраас 39 төрлийн хоолны дээж, 41 нэр төрлийн хүнсний түүхий эд бүтээгдэхүүн, ундны усны хоёр, агаарын таван сорьц, дөрвөн ундааны сорьц авч лабораторид нян судлалын шинжилгээнд хамруулжээ. Мөн тус түргэн хоолны газрын нийт 28 ажиллагсдаас ХӨСҮТ-ийн тархвар судлаач эмч, лаборант нар тухайн ажлын байранд байрлан эрүүл мэндийн үзлэг хийж, нян тээгч илрүүлэх шулуун гэдэсний арчдасын сорьц авч шинжилгээнд хамруулаад байна. Шинжилгээний хариугаар ус болон бүтээгдэхүүнээс өвчин үүсгэгч илэрсэн гэх мэдээллийг албанаас өгөөд буй. Хамгийн ноцтой нь тус байгууллагын хоёр ажилтан цусан суулга өвчний халдвартай байсан нь илэрсэн байна. Тэд эрүүл мэндийн үзлэгийн хуудсыг хуурамчаар үйлдсэн нь шалгалтаар тогтоогдсон аж.
Иймд гаргасан зөрчлийг үндэслээд Зайсан салбарын үйл ажиллагааг зогсоосон. Mөн тус салбарт болон эрүүл мэндийн бичгийг хуурамчаар үйлдсэн гэх хоёр ажилтанд Mэргэжлийн хяналтын ерөнхий газраас зөрчлийн хэрэг үүсгэн шалгаж эхэлсэн байна.
НУУЦ.мн
