Нууц мэдээллийн уурхай

ABC-д мэдээлснээр өдгөө 48 настай Эдриан Мур нь 2011 онд Австралийн оны шилдэг цагдаагаар шалгарч байжээ. Тэрээр ажил дээр гялалзсан амжилт гаргаж онц ноцтой олон гэмт хэргийг илрүүлдэг ч хувийн амьдрал нь тун бүтэмж муутай явж иржээ. Ялангуяа 2006 онд найз эмэгтэйдээ хаягдсан нь сэтгэлзүйн том цохилт болж гүн хямралд унагасан. Тэр үеэс хойш бүсгүйчүүдэд итгэх итгэлээ алдсан гэхэд болно. Хаягдсанаасаа хойш танилцах сайтаар дамжуулан эмэгтэйчүүддээ танилцаж болзож байсан ч нэгэнд нь ч бүрэн итгэж дотно харилцаа тогтоосонгүй. Эсрэг хүйстэндээ итгэж чадахгүй байгаа энэ нөхцөлд сэтгэлзүйчид хандах учиртай ч эрэлхэг цагдаа өөр аргаар "ажиллажээ". Бүр албан тушаалын давуу байдлаа ашигласан гэнэ. Тэрээр эрх мэдлээ ашиглан танилцсан эмэгтэй бүрийнхээ хувийн мэдээллийг цагдаагийн нууц цахим сангаас авч үзэж улмаар харилцаандаа ашигладаг байжээ. Өөрийх нь тухай бүх мэдээллийг мэдэж байгаа гэдгээ танилцсан эмэгтэйчүүддээ мэдээж хэлсэнгүй.  Зөвхөн албан ажилд ашиглах учиртай сайтад романтик зорилгоор нэвтэрдэгээ хамт ажиллагсадаасаа ч чанд нууж байжээ.  Ийнхүү сүүлийн 13 жилийн турш танилцах "Tinder" сайтаар дамжуулан танилцсан эмэгтэйчүүдийнхээ хувийн мэдээллийг албаны сайтаасаа авч үзэж ашигласаар иржээ. Харин өнгөрсөн оны 2-р сард нэгэн соргог эмэгтэй энэ тухайд сэжиг авч өөрийх нь талаар бүхнийг мэдэж байгаа цагдаагийн талаар удирдлагад нь гомдол гаргажээ. Эдриан Мурыг тэр дор нь албан тушаалаас нь түдгэлзүүлж дотоод мөрдлөг эхлүүлжээ. Дотоод мөрдлөгөөр тэрээр цагдаагийн нууц цахимд санд нийтдээ 180 удаа хандаж 180 эмэгтэйн хувийн мэдээлэлтэй танилцсан нь тогтоогджээ. Энэ нь цагдаа амьдралынхаа ханийг маш идэвхитэй эрж хайж байсныг нь харуулж байна. Хайр сэтгэлийн төлөө албаны цахим санг ашигласан цагдаагийн шүүх хурал энэ сарын 1-нд болжээ. Шүүгч түүний үйлдлийг иргэдийн итгэлийг урвуулан ашигласан гэмт үйлдэл, улмаар төрийн албан хаагчдад итгэх итгэлийг алдагдуулсан хор уршигтай хэмээн үзэж зургаан сар хорих, хоёр мянган австрали доллараар торгох ял оноожээ.

НУУЦ.мн