Нууц мэдээллийн уурхай

2011 онд 17 настай байсан хятад залуу Ван сургуулийн ахлах ангид сурч байхдаа үеийхнийхээ нэгэн адил “iPhone” гар утас барих хязгааргүй хүсэлд автсан байжээ. Гэсэн ч гэр бүлийн санхүүгийн боломж энэ мөрөөдлийг нь биелүүлж чадахгүй байв.  Хүслэн болсон гар утасаа барихын тулд юу ч хийхэд бэлэн болсон тэрээр эрүүл мэндийн нэгэн сайтнаас бөөрөө өндөр үнээр зарж болох тухай мэдээлэл уншжээ. Ингээд эрж хайсаар нэгэн зуучлагчтай уулзсан байна. Ярилцаж тохиролцсоны эцэст нь нэг бөөрөө 22 мянган юаниар зарахаар болжээ. Зуучлагч нь залууг хоёр мэс засалч дээр авчирч тэд нууц байдалд хагалгаа хийн өрөөсөн бөөрийг нь авчээ.

Мэс заслын дараа мөнгөө авсан залуу тэр өдөртөө л мөрөөдөл болсон “iPhone 4” болон “iPad 2” худалдан авч гэртээ баяр хөөртэй иржээ. Мөнгөтэй болсон нууцаа гэрийхэндээ хэлэлгүй таг нуужээ.  Гэсэн ч гар утсаараа удаан гангарч  чадсангүй. Удалгүй залуугийн ганц бөөрнийх нь ажиллагаа доголдож  бие нь гэнэт мууджээ. Шинжилгэээгээр бөөрний дутагдалд орсон нь батлагдсан байна. Ийнхүү өрөөсөн бөөрөө гар утсаар арилжсан залуу одоо болтол хэвтэрд эмчлүүлж байна.

Ихээхэн үнэтэй гемодиализийн эмчилгээнд орж байнгийн асаргаа сувилгаа шаардах болсон. Эцэст нь залуу бүх үнэнээ гэрийхэндээ хэлсэнд цагдаад ханджээ. Бөөрний зуучлагч болон хагалгаа хийсэн хоёр эмч шийтгүүлж тэднээс 1,5 сая юаны нөхөн төлбөр гаргуулж залууд өгчээ. Гэхдээ энэ нь хэзээ ч сэргэхгүй болсон  эрүүл мэндийг нь аварч чадахгүй юм.

НУУЦ.мн