Нууц мэдээллийн уурхай

Хэрэг явдал Сэлэнгэ аймгийн Ерөө сумын 3 дугаар баг, Бугант тосгоны “35-ын ам” гэх газарт болжээ. Энд уурхай ажилладаг агаад “Саян Жигүүр” компаний захирал Уянга эзэмшдэг, харин хөрөнгө оруулагч нь БНХАУ-ын иргэн Ман Мин Жүн гэнэ. Тус уурхай нь техник хэрэгсэл муутай голдуу түрээсээр авч ажиллуулж байжээ. Улаанбаатар хотоос  түрээсээр авчирсан Б-Э нарын машин техникууд нь байнга эвдэрч ажил удаашруулж байсан нь хятад монгол эздийн уур цухлыг төрүүлж өөр хүмүүс оруулжээ. Харин энэ нь техникээ засаад л ажиллаад байсан залуусд таалагдсангүй. Ажлын эрх ашгийн үүднээс хэнтэй ажиллахаа шийдэх нь удирдлагын эрх мэдэл ч хятад монгол захирлууд нэлээд дээрэнгүй байдлаар шаардлага тавьжээ. Хятад хөрөнгө оруулагч болон монгол захирлаа зодсон нь тогтоогдсон Б-Э нь “Жан Мин Жүн намайг зайл гэж монголоор хэлсэн” гэжээ. Өөр нэгэн гэрч “муу эвдэрхий машинаа аваад яв гэж хөөсөн” гэж мэдүүлсэн. Хөөж байгаа зэрэг нь тус уурхайд хятад хөрөнгө оруулагч ихээхэн эрх мэдэлтэйг харуулж байна гэхэд болно. Хятад хөрөнгө оруулагч нь монгол хэлтэй ч монголчуудыг сайн мэддэггүй аж. Монголчууд нутаг дээрээ гадныханд тэр тусмаа хятадуудад хөөгдөх тун дургүй. Болсон явдлын тухай хятад хөрөнгө оруулагч нь “...уурхайн хүмүүсийн амьдардаг гэрүүдийн урдуур явж байхад цагаан өнгийн Хоово гэх машинтай зүс таних залуу ирээд чанга дуугаар орилоод мөр болон нүүр лүү цохисон. Зугтаад вагончиг дотор орж дотроос нь түгжсэн.  Тэр залуу ахин гурван хүн дагуулж ирээд хаалга өшиглөж цонх хагалсан. Уянга хаалган дээр зогсоод гадаа байгаа хүмүүст юм хэлээд байх шиг байсан. Залуус  хаалга эвдэж орж ирээд нүүр лүү цохиход ухаан балартаад унасан ...” гэжээ. Энэ зодооны үеэр монгол захирал ч зодуулж гэмтжээ. Шүүх энэ хэргийг шийдвэрлэж монгол захирал эмэгтэй, хятад хөрөнгө оруулагчийг зодсон залууг 800 мянган төгрөгөөр торгожээ.

НУУЦ.мн