Нууц мэдээллийн уурхай

Tokyo Reporter –д мэдээлснээр 30 настай Жуниа Хида нь хулгай, хүчин зэрэг хэд хэдэн гэмт хэрэг үйлдсэн онц аюултай этгээд байжээ. Цагдаа нар түүнийг эрэн хайсаар Тондабаяси хотоос олж баривчилан цагдаагийн хэсэгт хүргэсэн байна. Камерт хоригдож байсан гэмт этгээдтэй оройн цагаар өмгөөлөгч нь ирж уулзжээ. Тэр хоёрыг байцаалтын өрөөнд уулзуулсан агаад уулзалтын дараа 22 цагийн үед өмгөөлөгч нь гараад явжээ. Байцаалтын өрөөний хаалга нээгдэж хаагдах үед дохиолол дуугардаг ч тухайн өдөр төхөөрөмжний зай нь суусан тул дуугарсангүй. Ийнхүү өмгөөлөгчийг гарч явахыг тухайн үед хэсэгт байсан 20 гаруй цагдаагийн хэн нь ч мэдээгүй гэнэ. Өмгөөлөгчийн араас нь гэмт этгээд өрөөг орхиж улмаар хэсгээс гарч явахыг мөн хэн ч анзаарсангүй.  Эцэст нь 22 цаг 45 минутын үед л сая цагдаа нар байцаалтын өрөөнд хэн ч байхгүй байгааг мэдэж түгшүүр авчээ. Ийнхүү онц аюултай гэмт хэрэгтэнг улс орон даяар эрэн хайх 48 цаг үргэлжилсэн ажиллагаа  эхэлжээ. Японы газар сайгүй цагдаагийн эргүүл гарч машин, автобус зэргийг шалгасан байна. Хоёр өдрийн дараа улсын бараг нөгөө хязгаарт нэгэн цагдаа замын дэлгүүрийн хажууд зогсох сэжиг бүхий дугуйг ажиглажээ.

Дугуйны эзэн нь эрэн сурвалжлагдаж байгаа этгээдтэй ижил шивээстэй байсанд нэмэлт хүч дуудсанаар цагдаагийн хэсгээс амархан гарч явсан Жуниаг баривчилжээ.  Тэрээр хулгайлсан дугуйгаараа хол зутгааж яважээ. Энэ явдал ихээхэн шуугиан дэгдээсэн агаад Хууль зүйн сайд нь газар бүрд эргүүл пост ажиллуулж олон нийтийг чирэгдүүлсэндээ уучлал гуйсан.  Гэмт этгээдийг баривчилсаны дараа хэрхэн оргож чадсаныгнь тогтоохоор цагдаагийн дотоод мөрдлөг явуулсан. Тухайн үед хэсэгт 20 гаруй цагдаа байсны ихэнхи нь өөрийн ажлаа хийж байжээ. Харин гэмт этгээдийг харгалзах, өмгөөлөгч нь уулзуулах, уулзалтын дараа камерт нь буцаан хийх үүрэгтэй 40 настай түрүүч ажилдаа хайнга хандсанаа хүлээсэн.  Тэрээр гэмт этгээдийг өмгөөлөгчтэй хамт байцаалтын өрөөнд оруулсаны дараа гар утсаараа бейсболын тэмцээний дүн үзээд сатаарсан гэжээ. Дотоод мөрдлөгийнхэн чухам юу үзсэнийг нь тодруулахаар нарийвчлан шалгалт хийхэд санаанд оромгүй явдал гарчээ. Гэмт этгээдийг нүд салгалгүй харгалзах үүрэгтэй түрүүч маань гар утсаараа спортын мэдээ бус харин порно үзэж байсан нь хөдөлбөргүй тогтоогджээ. Бүр ухаанаа алдсан байсан тул өмгөөлөгч дараа нь гэмт хэрэгтэн гарч явахыг анзаараагүй аж. Энэ явдалтай холбогдуулан Тондабаяси хотын цагдаагийн хэлтсийн долоон ажилтанд арга хэмжээ авчээ. Порнод хорхойтой түрүүчийн цалинг тодорхой хугацаагаар бууруулсан гэнэ.

NUUTS.mn