Нууц мэдээллийн уурхай

Уул уурхайн дэд сайд асан О.Эрдэнэбулганыг дахин хорьжээ. Эх сурвалжийн мэдээллээр түүний дүүгийн гэрт хуулийн байгууллагынхан нэгжлэг хийх үеэр хорих үндэслэл бүхий эд мөрийн баримт олсон гэх мэдээлэл ирсэн юм. Өмнө нь О.Эрдэнэбулганыг нэг сарын хугацаатай хорьж байгаад батлан даалтад сулласан талаар бид мэдээлсэн. Түүнийг Нийслэлийн прокурорын газраас 2018 оны 11 сарын 22 -ны өдөр Эрүүгийн хэргийн хянан шийдвэрлэх тухай хуулийн 14.9 дүгээр зүйлийн нэгдэх хэсгийн 1.2-т заасан үндэслэлээр цагдан хорих санал ирүүлж, цагдан хорьсон байдаг. О.Эрдэнэбулганы өмгөөлөгч Х.Базаррагчаа дээрх шүүгчийн захирамжийг үндэслэлгүй хэмээн үзэж, Хан-Уул дүүргийн эрүүгийн хэргийн анхан шатны шүүхийн Ерөнхий шүүгчид гомдол гаргаж, улмаар шүүхээс түүнийг суллах шийдвэрийг гаргаж байсан билээ.

Уул уурхайн дэд сайд асан О.Эрдэнэбулганыг үнэ тогтворжуулах хөтөлбөртэй холбоотой асуудлаар шалгаж байгаа гэх мэдээлэл бий. Мөн түүнийг Уул уурхайн дэд сайдаар ажиллаж байхдаа ураны лиценз наймаалсан байж болзошгүй гэсэн хэрэгт ч буруутгаад буй билээ.

NUUTS.mn