Ж.Батзанданг АН-ын гишүүнээс нь хасаж, Л.Болд, Д.Мурат нарын сонгуульд өрсөлдөх эрхийг нь хасав
.jpg)
АН-ын дарга С.Эрдэнэ, Ерөнхий нарийн бичгийн дарга Ц.Туваан, АН-ын бүлгийн дарга Д.Эрдэнэбат нар цаг үеийн асуудлаар мэдээлэл хийлээ. Өнөөдөр өглөө хуралдсан Ардчилсан намын Үндсэн дүрмийн хороо хуралдаанаар УИХ-ын гишүүн Ж.Батзандан, Л.Болд, Д.Мурат нарыг намын үндсэн дүрэм зөрчсөн гэсэн шийдвэрийг гаргасан. Энэ дагуу Ардчилсан намын бүлэг хуралдаж Үндсэн дүрмийн хорооны шийдвэрийг хэлэлцсэн байна. Мөн Ардчилсан намын дарга С.Эрдэнэ Үндсэн дүрмийн хорооны гаргасан шийдвэрийн дагуу нэр бүхий дээрх гишүүдэд улс төрийн хариуцлага тооцох шийдвэрийг гаргажээ.
Тэрбээр УИХ-ын Ж.Батзанданг намын гишүүнээс дөрвөн жилийн хугацаанд хассан бол Л.Болд, Д.Мурат нарыг дөрвөн жил хүртэлх хугацаанд АН-аас төрийн сонгуульд нэр дэвших болон албан тушаалд томилох, хаших эрхийг нь хассан байна. Энэ талаар Ардчилсан намын дарга С.Эрдэнэ "Ардчилсан намын улс төрийн зөвлөлөөс Ардчилсан намын бүлэгт Засгийн газрыг огцруулахыг дэмжих ёстой гэсэн чиглэл өгсөн. Энэ дагуу бүлгийн гишүүд намын дүрмийнхээ дагуу бүлгийн шийдвэрээ дагах байсан. Гэтэл дээрх гурван гишүүн өөр шийдвэр гаргасан. Шийтгэл хүртсэн гишүүд өөрсдөө өргөдлөө гаргаад асуудлаа шийдүүлэх эрх нээлттэй" гэлээ.
NUUTS.mn
