Нууц мэдээллийн уурхай

УИХ-ын 53 гишүүн үг хэлж дууссаны дараа 20:06 цагт Монгол Улсын Ерөнхий сайд У.Хүрэлсүх үг хэллээ.

Тэрбээр "Өнгөрсөн нэг жилийн хугацаанд бидэнд хийж хэрэгжүүлсэн зөндөө ажлууд байгаа. Эхэлж байгаа ажлууд ч бий. МАН, Засгийн газрын мөрийн хөтөлбөрийг хэрэгжүүлэхийг зорьж байна. Бүх зүйлииг засаж залруулж чадахгүй байна. Надад цаг хугацаа хэрэгтэй байна.

Нэгдүгээрт би шударга ёс, сахилга хариуцлагыг сайжруулах чиглэлд, хоёрдугаарт улсын унаж байгаа эдийн засгийн сэргээхийн төлөө ажиллана.

Би үлдсэн ч, үлдээгүй ч УИХ дотор сууж байгаа зарим хүмүүстэй ёс зүйн, хуулийн ч хариуцлага тооцно. Надад хариуцлага тооцох цаг бол байгаа. Хаянхярвааг огцруулсны дараа 27 гишүүн Засгийн газрыг огцруулах бичигт гарын үсэг зурсан. 27 гишүүн дотор найз нөхдөө бодоод гарын үсэг зурсан хүмүүс байгаа байх. М.Энхболд дарга ажлаа өг. Би намын даргын хувиар хэлж байна. Олон жил дарга хийлээ.Төрийн тэргүүнд хүртэл нэр дэвшлээ. Нөхдийгөө шар махтай нь хатаахаа боль. Одоо УИХ-ын гишүүний ажлаа хий".

Түүнийг үг хэлсний дараа санал хураалт явуулж УИХ-ын чуулганы өнөөдрийн хуралдаанаар эцэслэн шийдвэрлэлээ.

Ингээд Байнгын хорооны санал дүгнэлтээр Ерөнхий сайд У.Хүрэлсүхийг огцруулахыг дэмжье гэсэн томьёоллоор санал хураахад 40 гишүүн дэмжсэнгүй. Өөрөөр хэлбэл, санал хураалтад 73 гишүүн оролцож 40 гишүүн Засгийн газрыг огцруулахыг дэмжсэнгүй. Ингэснээр хуралдаанд оролцсон гишүүдийн 54.8 хувийн саналаар У.Хүрэлсүхийн Засгийн газрыг авч үлдлээ.

NUUTS.mn