Нууц мэдээллийн уурхай

Өнөөдөр УИХ-ын гишүүн Ж.Мөнхбат сэтгүүлчдэд мэдээлэл хийлээ. Тэрээр "Би өөрийн албан баланк дээр УИХ-ыг тараах асуудлаар тогтоолын төсөл бичиж, өөрөө гарын үсэг зураад байна. Миний хөндсөн энэ асуудлыг хэд хэдэн гишүүн дэмжихээ илэрхийлсэн. УИХ-ын гишүүдийн 2/3 нь дэмжсэн тохиолдолд УИХ тардаг. Энэ нь Ерөнхийлөгчийн явуулсан бичгээс өөр хуулийн заалтаар зохицуулагдах юм. Би өмнө нь Ерөнхий сайд У.Хүрэлсүхтэй уулзаж, Засгийн газрынхаа сайд нартай хариуцлага тооцох хэрэгтэй гэж хэд хэдэн удаа сануулсан хэлсэн. Ерөнхий сайд чуулганы хуралдааны үеэр УИХ-ыг тараах асуудлыг хөндөж, Үндсэн хууль зөрчсөн. Өчигдөр намын байран дээр хэсэг залуусыг бас турхирсан байгаа. Засгийн газрын тэргүүн ингэж ажиллаж болохгүй.

УИХ-ын олон гишүүн ЖДҮХС-тай нэр холбогдсоноос үүдэж, нэр хүнд нь ихээр уналаа. Томилдог газрууд нь хариуцлага тооцож чадахгүй байна. Ийм чадамжгүй УИХ байсны хэрэггүй. УИХ тар гэж байгаа юм. Энэ бүхнийг хөндөж ярьж байгаа учраас намайг зориудаар гүтгэж бичиж байна. Надтай холбогдсон концессийн гэрээг цуцлах албан бичгийг би нэлээн дээр явуулсан байдаг.

Намайг өндөр үнэтэй байр авсан ч гэж үзсэн. Би бүх зүйлээ хуулийн дагуу явуулдаг. Миний ХОМ дээр дэлгэрэнгүй байгаа. Би хавар тоглолт зохион байгуулж, 140 сая төгрөг олсон. Бүгдийг нь оюутны төлбөрт хандивласан" гэсэн мэдээлэл өглөө.

Мэдээлэл хийснийхээ дараа сэтгүүлчдийн асуултад дараах хариултыг өглөө.

-Нэг намын дотоод үл ойлголцлоос үүдэж, нийгэмд эмх замбараагүй байдал үүсвэл хэн хариуцлага хүлээх вэ? Та бүхэн дотооддоо учраа олж болохгүй байгаа юм уу?

-Манай намын дотоод асуудал улс төрийн хүрээнд  тодорхойгүй гацаа үүсгэж байгаа нь үнэн. Үүнээс бид гарах ёстой. Үймээн гаргах гэсэн, нийгмийн албан хатгасан үйлдлүүд хийхгүй байх аа гэдэг би итгэж байгаа. Албан тушаалыг авч болдог, өгч болдог. Энэ бүхний тэргүүн эгнээнд хүний амь, нийгмийн амгалан тайван байдал явах ёстой гэж би бодож байгаа. Намын удирдлагууд энэ бүх асуудлыг анхаарч байгаа гэдэгт итгэж байна.

-Танд одоогоор УИХ-ыг тараах бичигт гарын үсэг зурахаа илэрхийлээд байгаа гишүүдийн нэрийг хэлэх боломжтой юу?

-УИХ-ыг тараах бичигт Ё.Баатарбилэг, Ж.Бат-Эрдэнэ тэргүүтэй УИХ-ын 5-6 гишүүн гарын үсгээ зурна гэдгээ надад илэрхийлсэн.

НУУЦ.мн