Нууц мэдээллийн уурхай

“Босоо хөх Монгол” ТББ”-ынхан Нийслэлийн Засаг дарга Э.Бат-Үүл, Цагдаагийн ерөнхий газрын дарга, Улсын ерөнхий прокурор нарт ирэх даваа гарагт МҮОНРТ-д шууд ярилцлагад орох хүсэлт тавилаа. Бурхан Халдун ууланд гадаадын иргэдэд зүй бус авирласан зарим иргэний ёс зүйгүй үйлдлээс үүдэн хотын захирагч Э.Бат-Үүл өвөрмонголчуудаас албан ёсоор уучлалт гуйж байгаагаа мэдэгдсэн. Гэвч “Босоо хөх Монгол” бүлгэмийн залуус энэ асуудалтай холбоогүй бөгөөд тухайн үед хэсэг хүн өвөрмонголчуудыг шоглож байсныг таслан зогсоож, учир зүйг нь олж тэдэнд тусалсан болохоо хэллээ. Харин хотын Захирагч тэднийг нүүрээ нуусан эх орончид гэж хэлсэн явдал нь ч тэдний эгдүүцлийг хүргэж байгаа аж. Хууль цагдаагийн байгууллагаар шалгуулаагүй байж, хэний буруу гэдгийг тогтоогоогүй байж яаран уучлалт хүссэн явдал нь эх оронч залуучуудын нэр төрд халдсан хэрэг боллоо гэсэн юм. Энэ талаар “Босоо хөх Монгол” бүлгэмийн удирдах зөвлөлийн гишүүн Г.Ганхуяг ийм тайлбар өгсөн.

Тухайн үед байсан өвөрмонгол иргэнийг Алтан-Уул гэдэг бөгөөд нутаг руугаа буцсан байна. Түүнээс үнэн зөв мэдээллийг авахаар Замын-Үүдэд очсон боловч бүлгэмийн найман гишүүнд хилийн хориг тавьсан байжээ. Тиймээс Алтан-Уултай утсаар ярьсан бичлэгээ үзүүлсэн юм. Тухайн бичлэгт хохирогч гэгдээд буй өвөрмонгол эрэгтэй аварсанд баярлаж буйгаа илэрхийлжээ.
Үйл явдлын талаар судалж мэдээгүй байж ийнхүү хориг тавьсан нь хууль бус тул тэд шууд ярилцлагадаа Улсын ерөнхий прокурорыг уриад байгаа юм байна. Тиймээс холбогдох албан тушаалтнуудтай ярилцаж, зөв буруугаа хэлэлцэн, ойлголцолд хүрэхийг хүсч байгаа юм. Өвөрмонголд суугаа иргэд энэ үйл явдлын талаар видео бичлэгийг тун удахгүй ирүүлэх юм байна.

НУУЦ.мн