Нууц мэдээллийн уурхай

Daily Mail –д мэдээлснээр 2016 онд цагдаа Английн Дербишир гүнлэгийн Алан Йоманис гэдэг эрийг хар тамхины наймааа, мөнгө угаах, татвараас зайлсхийх зэрэг олон төрлийн хэргээр баривчилсан. Энэ хугацаанд шүүх түүнд зургаан жилийн хорих ялыг эчнээгээр оноогоод хууль бус аргаар олсон эд хөрөнгийг нь илрүүлэх үүргийг цагдаад өгчээ. Эчнээ ял авангуутаа их юм үзсэн эр шуудхан дампуурсанаа зарласан. Шүүхэд нэхэмжлэл гарган бүрмөсөн дампуурсан болохоо тогтоолгож урьдын их хөрөнгөнөөс нь 300-хан фунт буюу 1,6 сая төгрөг хүрэх л эд зүйл үлдсэн хэмээн мэдэгджээ. Харин цагдаа нар зальтай эрийн нуусан хөрөнгийг олох гэж хоёр жил бидэрсэний дараа хөдөө дэх ээжийх нь хуучин байшингаас бараг л язгууртны гэмээр ордон олоод мэд гайхжээ. Ээжийх нь хэн ч тоож харахааргүй муу байшин нь гадна талаасаа иймэрхүү өрөвдөлтэй юм харагддаг гэнэ.

Харин цаад тал нь буюу дотор талаасаа тансаг харш гэдэг нь шууд мэдэгддэг.

Хашаан доторхи хойд талыг мөн л ингэж тун аятайхан засаж тохижуулжээ.

Гэхдээ хамгийн сонирхолтой зүйл нь хуучин муу байшин дотор нь байсан. Хөдөөний байдаг л нэгэн байшин гэхэд дотроо тансаг тавилгатай зургаан унтлагын өрөө, дөрвөн угаалгын өргөө, нүд гялбам тохижуулсан зочдын том танхим, хамгийн сүүлийн үеийн загварын гал тогоотой.

Зочдын өрөөний тавилгыг цэвэр царс модоор хийжээ.

Хананд нь 16-р зууны үеийн ховор үнэт уран зургууд дүүрэн өлгөөстэй.

Цагдаагийн гаргасан хүсэлтийн дагуу шүүх тэр дор нь хуучин байшингаар өнгөлөн далдалсан тансаг харшийг битүүмжилж дуудлага худалдаанд оруулахаар шийдвэрлэжээ. Дуудлага худалдааны  “John Pye Auctions” товчооны үнэлсэнээр ээжийнх нь эвдрэх шахсан байшин нь доторх тавилгын хамт 1,2 сая фунт буюу бараг дөрвөг тэрбум төгрөгт хүрэх ордон гэнэ. Харин уран зургийн цуглуулга, тансаг эдлэл нь нийлээд 83 мянган фунт буюу 350 сая төгрөгөөр үнэлэгджээ. Тансаг эдлэл, уран зургаас гадна зальт эрийн гангараа болсон 25 мянган фунт буюу долоон саяын үнэтэй Rolex Daytona брэндийн цагийг нь мөн хураан авчээ. Үүнээс гадна ээжийнхээ ногооны талбайд хүлэмж бариад 40 мянган фунт буюу 25 сая төгрөг хүрэх мариухана тариалсан нь илэрчээ.

Ийнхүү хар тамхи наймаалагч, мөнгө угаагч эрийн хэрэг ахин нэмэгдэж ял нь чангарчээ. Шүүх эчнээ өгсөн зургаан жил дээрээ тавыг нэмсэн байна. Дээр нь хураагдсан нийт хөрөнгийн үнийн дүнгийн талтай тэнцэх хэмжээний торгууль төлөхийг үүрэгджээ. Харин ээжийг нь хүүтэйгээ хуйвалдсан гэх баримт олдоогүй тул хэргээс чөлөөлжээ.

НУУЦ.мн