Вьетнамын дайны хамгийн алдартай нэгэн зургийн ТҮҮХЭЭС ...
Нийтэлсэн: 2018-09-12 09:59:04
.jpg)
Вьетнамын дайны хамгийн алдартай зургийн нэг нь Хойд Вьетнамын армийн гэрэл зурагчины авсан энэ зураг юм. Зурагт жижигхэн биетэй, 17 настай Нгуен Тхи Ким Лай автомат бариад олзны аварга биет америк нисгэгчийг тууж явааг буулгасан. Энэ явдал Америкийн армийн "Rolling Thunder" байлдааны ажиллагааны үеэр 1965 оны 9-р сарын 20-нд болсон. Байлдааны ажиллагааны үеэр “F-105” онгоц зенитийн суманд оногдон сөнөөгдөж нисгэгч ахмад У.Фарби шүхрээр үсэрсэн. Амьд гарсан байж магадгүй нисгэгчийг хайхаар “HH-43” загварын хоёр байлдааны нисдэг тэрэг хөөрсөн. Гэсэн ч вьетнамчуудын зенитийн галд “с/н 62-4510” дугаартай нь оногдож экипажийн дөрвөн гишүүн олзлогдсон. Олзлогдсон нисгэгчдийг тууж явах үед энэ зургийг даржээ. Гэрэл зурагчин туугч болон туугдагч хоёрын биеийн харьцааг тод харуулахын тулд зөвхөн бортинженер Уйльяам Робинсон болон байлдагч эмэгтэй хоёрыг л оруулан зургийг нь даржээ. Зургийн өгүүлэмж нь бяцхан Вьетнам агуу том Америкийг ялж байгааг илэрхийлэн тэр дороо дэлхийгээр тарж маш их алдаршсан. Вьетнамчууд энэ зургаар марк хүртэл гаргасан. Олзноос ирсэний дараа бортинженер нь эрэн хайх ажиллагааны үеэр эр зориг гаргасан хэмээн Америкийн Нисэх хүчний Загалмай одонгоор шагнуулсан. 1995 онд Японы NHK ТВ зургийн талаар тусгай нэвтрүүлэг хийх үеэрээ Уйльяам Робинсон болон Нгуен Тхи Ким Лай хоёрыг уулзуулжээ.
НУУЦ.мн
