Нууц мэдээллийн уурхай

People –д мэдээлснээр Америкийн Нью-Йорк мужийн Лоуренс гэдэг жижигхэн хотын бүсгүй Элизабет Жэймс одоогоос зургаан сарын өмнө найз залуудаа хаягджээ. Нохойд дуртай экс нь хэд хэдэн нохой тэжээдэг агаад явахдаа Аварга гэдэг мастифаа үлдээгээд явжээ. Гэтэл хаягдсан бүсгүй хамаг уур хорсолоо нохойд нь гаргаж өшөө хорсолоо тайлж гарчээ. Найз залуугаа явсан даруйд нь бүсгүй Аваргыг хашаандаа гарган уяжээ. Ингээд зориуд санаатайгаар хооллож ундлахгүйгээр өлсгөж харангадуулж эхэлсэн байна. Хөөрхий нохой хурдан хугацаанд турж эцжээ. Хоол тэжээлийн дутагдлын улмаас биеийн эсэргүүцэл нь суларч үс нь унаж элдэв шимэгчидэд бариулжээ. Хөдөлгөөнийг нь эрс хязгаарласан тул булчин шөрмөс нь суларсан байна. Сүүлдээ тураалын туйлд хүрч яс арьс болоод байхад нь азаар нэгэн иргэн олж харан цагдаад мэдээлжээ. Гэрийн тэжээвэр амьтантай хэрцгий харьцсан хэргийн дуудлагаар цагдаа нар Элизабетийн гэрт ирэхэд ясанд дээр тохсон арьс болтлоо турж ямар ч тамир тэнхээгүй болсон нохой угтжээ.

Нохойг тэр дор нь мал эмнэлэгт хүргэж харин бүсгүйг баривчилжээ. Малын эмч нарын Аваргын байдлыг үхлийн ирмэгт ирсэн гэж тодорхойлсон байна. Түүний насны нохойн хэвийн жин 50 кг байх ёстой атал дөнгөж 22 кг хүрэхтэй үгүйтэй байжээ. Хөл дээрээ ганц минут ч тогтож чадахгүй унаж байсан гэнэ.

Нохойг тэр дор нь эрчимт эмчилгээнд оруулан тэжээсэн. Харин баривчлагдсан бүсгүй хаяж явсан эксдээ гомдож хорсохдоо нохойг нь зориуд хооллодоггүй байснаа хүлээн зөвшөөрчээ. Тамлал тохуурхал нь хагас жил ашхуу үргэлжилжээ. Шүүх түүнийг 6248 долларын барьцаагаар сулласан агаад удахгүй шүүх гэнэ. Өдгөө Аваргын бие аажмаар тэнхэрч сайжирч байгаа аж. Түүнийг хаягдсан гэрийн тэжээвэр амьтдыг асрах газар ажиллуулдаг Жаклин Салливан гэдэг бүсгүй авчээ.

Тэрээр Justice for Champ гэдэг цахим хуудас нээж одоогоор 35 мянган дагагчтай болсон. Дагагчид нь нохойн эмчилгээ асаргаанд зориулан мөнгө хандивласаар байна.

Жаклин Аваргын тухай мэдээлэл бичлэгийг цахим хуудсандаа байнга оруулдаг гэнэ.

NUUTS.mn