Нууц мэдээллийн уурхай

IndianToday -д мэдээлснээр Энэтхэгийн Тамилнад мужийн Виллупурум хотын найман настай охин Ануприй дөрвөн жилийн өмнөөс дугуй худалдан авахаар мөнгө цуглуулж эхэлжээ. Цуглуулсан мөнгөө таван мөнгөний гахайд хийсэн нь нийтдээ 8846 рупий/40 мянган төгрөг/  хүрчээ. Дугуй авах мөнгө нь дөхөж байх үед саяхан хөрш Керал мужид нь том үеэр болжээ. Үерийн улмаас олон арван тосгон суурин усанд автаж эд материалын маш их хохирол учирч нийтдээ 370 хүн амиа алдсан.

Энэ гамшгийн тухай мэдээг зурагтаар үзсэн охин мөнгөний таван гахайгаа хагалан цуглуулсан бүхнээ үерт нэрвэгсэдэд туслах санд хандивлахаар шийджээ.  Охин цуглуулсан 8846 рупийгаа өгөхөд аав нь 9000 болгоод охиныхоо өмнөөс тусламжийн санд өгчээ. Мөн охин нь дугуй авахаар цугуулсан бүх мөнгөө үерт нэрвэгсэдэд хандивлаж байгааг сангийханд ярьжээ. Охины сайн үйлийн тухай мэдээг сангийханд хэвлэлд дамжуулж улмаар олон нийтэд хүрчээ. Энэ мэдээг хотын “Hero Cycles” дугуйн дэлгүүрийн эзэн Панкаджа Мунджала мөн сонсжээ. Ингээд охиныг дэлгүүртээ урин шинэ дугуй бэлэглэжээ.

Мөн насан туршдаа жил бүр хуучин дугуйгаа шинэ дугуйгаар сольж авах эрхийн бичгээр шагнасан байна.

НУУЦ.мн