Нууц мэдээллийн уурхай

Саяхны үргэлжлэн орсон усархаг, аадар борооны улмаас Хавдар судлалын үндэсний төвийн дээврээс дусаал гоожиж, хонгилд нь ус нэвчсэнээс болж Австрийн Засгийн газраас 7 сая еврогийн хөнгөлөлттэй зээлээр авсан туяаны шинэ аппаратны суурь эвдэрсэн. Энэ дуулиантай холбогдуулан ЭМ-ийн сайд Д.Сарангэрэл тэргүүтэй албаныхан газар дээр нь ажиллажээ. Эн үеэр сайд хатагтай "ХСҮТ-ийн байр, өргөтгөлийн байдалтай танилцлаа. Жил ирэх тусам хавдрын өвчлөл нэмэгдэх хандлагатай байна. Иймд энэ эмнэлгийн хуучин барилга болон, өргөтгөлийн барилга хаана нь ч хүрэлцэж, хүчрэхгүй. Тиймээс ХСҮТ-ийн яг хажууд баригдсан М.Билэгт гишүүний хувийн эмнэлэгийг улсын эмнэлэг буюу ХСҮТ- болгохоор гуйх санаа бий. Энэ эмнэлэг бол Япон, Солонгос улсын мэргэжилтнүүдийн зураг төслөөр яг стандартын дагуу баригдсан юм билээ. Дахин төсөв мөнгө тусгаж, шинэ компани шалгаруулах зэргээр явдал чирэгдэл учруулж цаг алдах асуудал их гарна. Тиймээс М.Билэгт гишүүний эмнэлгийг ХСҮТ болгох гуйлт саналыг Засгийн газарт оруулж үзнэ дээ. Бүтвэл маш том үр дүн гарна" хэмээн ихэд олзуурхангуй өгүүлэв. Ийнхүү өнгөрсөн хавраас эхэлсэн М.Билэгт гишүүний "шахаа" энэ зуны үеэр усны ачаар бүтэх шинжтэй болжээ. Дээрээс хур бороо, дэргэдээс ЭМ-ийн сайд нь дэмжээд өгөхөөр гишүүн хатагтайн эмнэлгийг төр авахгүй гээд яах билээ ...

НУУЦ.мн