Нууц мэдээллийн уурхай

Ийм санаанд оромгүй явдал Ховд аймагт гарчээ. Тус аймгийн Мөст сумын иргэн Ч.Б нь хувилгааны удмын хүн агаад хувилгааныхаа эдэлж хэрэглэж байсан эд хэрэглэлийг эрж сурж явсан гэнэ. Энэ үед Бөхчулуун гэх хүн залгаж хувилгаан өвөг дээдсийх нь шүтэж байсан бурхан шүтээнийг Алтай сумын Арал гэх газраас олоод аймгийн төвд авчирсан болохыг хэлжээ. Ингээд өгсөн дугаар луу нь залгахад бөө Ням... нь удмых нь бурхан шүтээн задрах гэж байгаа тул яаралтай ирж уулз гэжээ. Бөөгийн хэлсэний дагуу аймгийн төв оржээ. Хэлсэн газарт нь очиход бөө онгодоо буулгачихсан байсан агаад маргааш ир гээд явуулжээ. Маргааш нь очиход хувилгаан дээдсийх нь шүтэж байсан бурхан гэх дээлэнд ороосон зүйл өгсөн байна.  Өвөг дээдсийнхээ шүтээнийг олж авсан иргэн ихэд баярлаж бөөг аван бурханаа залахаар Мөст суманд гэртээ иржээ. Ирээд хоймортоо залсан гэнэ. Боодолтой зүйлийг задлах гэхэд “танайх өртэй байна, өрөө төлсөний дараа задал” хэмээн хоригложээ. Ингээд хэн ч боодолтой “бурхан”-д хүрсэнгүй. Энэ зуур тэд бөөд жинхэнэ үйлчилсэн байна.  Дээдсийх нь шүтээнийг олж өгсөнд талархаж цувуулсаар нийтдээ 960 мянган төгрөг өгчээ. Бөөгийн ээж дүү хоёрт тус бүр нь 40 мянган төгрөгөөр гар цайлгажээ. Бөөгийн дүүг аймагт хүргэж аймгийн төвөөс эмээ ээж хоёрыг авчирсан болон бөөгийн унааны зардлын бензинд 150, дизель түлшинд 400 мянган төгрөг зарцуулагдсан. Бөөгийн идээ зоог л гэхэд сая гаруй төгрөг болж 175 мянган төгрөгний зулын тос авчээ. Заларч ирсэн бөө гэрт нь байхдаа үдэш орой машиныг нь унан давхиж байгаад эвдээд бараг 800 мянган төгрөгний хохирол учруулчээ. Мөн бөөгийн хүнээс зээлсэн 350 мянган төгрөгийг төлөх зэргээр өөрийн хэмжээндээ л овоо “тансаглуулсан” гэнэ. Энэ зуурт бөө нь өдөрт 3-4 удаа бөөлж хэд хэдэн айлд засал хийгээд амжжээ. Ирээд бараг сар болсон ч бурханыг задлахыг ерөөсөө зөвшөөрөхгүй л байжээ. Удалгүй бөө Улаанбаатар ороод ирнэ хэмээн 35 мянган төгрөг аваад явсан ч алга болжээ. Сүүлдээ бүр холбоо тасарсан тул бурханыг задлахаас өөр аргагүйд хүрч хаширлан хэсгийн төлөөлөгчөө байлцуулан нээсэн байна. “Бурхан”-г ороосон цэнхэр өнгийн дээлийг задлахад дотроос нь цагаан өнгийн гялгар ууттай мотоциклын аккумлятор, цэрэг ногоон цүнх, хөгжирчихсөн үхрийн аргал, ууттай 500 гр хөх тариа, аман хуур, хоёр ширхэг хос оймс гарч иржээ.
 

НУУЦ.мн