Нууц мэдээллийн уурхай

Өмнө нь хахууль өгөгсөд хэргээ сайн дураараа илчилсэн гэх мэт шалтгаанаар Өршөөлийн хуульд хамрагддаг байсан бол өдгөө ял хүлээдэг болоод байна.  3,4-р хорооллын эцсийн “Crown” баарны эзэн Э.З нь Баянгол дүүргийн цагдаагийн ...-р хэлтсийн эргүүлийн цагдаа-жолооч М.П-д 150 мянган төгрөгний хахууль өгсөн хэрэгтээ нэг жилийн тэнсэн харгалзах ялаар шийтгүүлжээ. Энэ баар нь өглөөний 04 цаг хүртэл ажилладаг агаад баарны эзэн нь П.З-д түрээслүүлсэн гэх ч хэрэг гардаг өдөр өөрөө ажиллаж байжээ. Тухайн өдрийн өглөөний 04 цагт баараа хаагаад ажилчдынхаа цалинг тавьчихаад тарах гэж байхад эргүүлийн цагдаа-жолооч орж иржээ. Тэрээр гурав хоногийн өмнө гарч байсан заалны зохион байгуулагчийг асуусан нь баар түрээслэгч Золбаярыг хэлсэн бололтой. Ингээд баарны эзэнг дагуулан гарч эргүүлийн машиндаа суугаад  3, 4-р хорооллын цагдаагийн кабон дээр ирж дотогшоо орохгүйгээр үүдний довжоон дээр халз ярилцжээ. Цагдаа-жолооч “танай нөгөө ээлжин дээр насанд хүрээгүй хоёр хүнд архи согтууруулах ундааны зүйлээр үйлчилсэн зөрчил гарсан, Зөрчлийн хуулиар багадаа 500 мянган төгрөгний торгуультай, торгуульна гэвэл өглөөний 06 цагийн рапортод орууллаа” гэжээ. Баарны эзэнг түрээслэгчээсээ асуух гэхэд “500 мянгаа дундаа хийн 250 мянгыг өгөөд сал” гэжээ. Хариуд нь ажилчдын цалингаа тавиад мөнгө муутай байгаагаа хэлэхэд “яваад 10 минутын дотор 150 мянган төгрөг аваад ир” гэсэн байна. Гэхдээ кабон луу орох хэрэггүй гэж анхааруулжээ. Баарны эзэн орлогоосоо хэлсэн мөнгийг нь аваад ачирч өгөхөд цагдаа-жолооч ахиж уулзах хэрэггүйг сануулаад явуулжээ. Эргүүлийн цагдаа-жолооч түрээслэгч ажилладаг өдөр бааранд шалгалт хийсэн нь үнэн байжээ. Хөгжим унтраалгаад баарны голоор явж үзэхэд архи согтууруулах ундааны зүйл хэрэглэж байсан бие бялдар, царай зүсээрээ насанд хүрээгүй байж болзошгүй таван үйлчлүүлэгч гарч иржээ. Тэднийг кабон дээр авчиран шалгахад 18 настай хоёр хүүхэд, 17 настай нэг хүүхэд, 19-20 настай хоёр залуу байжээ. Гэсэн ч дараа дараагийн дуудлагандаа дарагдаад нөгөө хэдийг “мартаад” явуулсан гэнэ. Мөн баарныхан ч цагдаа нар үйлчлүүлэгчдийг нь авч явсан ч эргэж орж ирээгүй тул мөн тоолгүй орхижээ. Харин цагдаа-жолооч болсон явдлыг мартаагүй тул гурав хоногийн дараа дахин ирсэнээр энэ хэрэг үйлдэгджээ. Шүүхээс экс цагдаа-жолоочийг 10 сая төгрөгөөр торгосон байна.
 

НУУЦ.мн