Нууц мэдээллийн уурхай

BBC –гээр цацагдсан “Robbie's War: The Rise and Fall of a Playboy Billionaire” гэдэг баримтат кино өдгөө Англи болон дэлхий олон оронд шуугиан тарьжээ. Өөрийгөө Чингис хаан болон Ираныг захирч байсан Ил хаадын удмаас гаралтай гэж зарладаг тэрбумтан Роберт Ченгиз  олон жил ханилсан эхнэр хүүхдээсээ салаад тэднийхээ нүдэн нүдэн дээр орос загвар өмсөгчтэй нялуурдаг болжээ. Тэрбумтны  намтрыг товч дурдахад өдгөө 57 настай агаад Ираны Тегеран хотод төрсөн. Аав нь угсаа гарлаа Ил хаадын удмынхнаас эхлэн тоолдог сурвалжит язгууртан бол ээж нь чинээлэг жүүд гэр бүлээс гаралтай байжээ. 1979 онд Ираны хувьсгалын дараагаар Англид нүүж ирсэн. Залуугаас хөрөнгө чинээгээр гайхуулан кино одод, загвар өмсөгчидтэй амраглаж “плэйбой” нэр авсан.

2008 оны санхүүгийн хямралаар золтой л дампуурчихаагүй агаад 2011 онд “Icelandic” банкаас хууль бусаар 1,4 тэрбум фунтын зээл авч санаатай дампууруулсан хэргээр баривчлагдаж байсан. Олон банкийг дампууруулсан хэрэгт сэжиглэгддэг. Дампуурсан “Kaupthing” банкны эрх хүлээн авагчид одоо ч тэрбумтантай заргалдсаар байна. "Чингис" тансаглал, шуугиант зугаа цэнгээ, дээдсийн хүрээлэнгийн хүлээн авалт, кино одод, загвар өмсөгч бүсгүйчүүдтэй орооцолдсон дуулианаараа алдартай. Албан ёсны эхнэр нь Хизер Берд гэдэг америк эмэгтэй агаад тэрбумтны нэгэн гоо сайхны эмнэлгийн хамтран эзэмшигч байсан.

Тэд Лондонгийн дээдсийн хүрээлэнгийхэн амьдардаг дүүрэгт алдарт "Альберт-холл” концертын танхимын дэргэд  26 сая фунтын үнэтэй дөрвөн давхар тансаг хаусандаа  "хамтдаа" амьдардаг.

2008 онд эхнэр нөхөр салсан агаад салах зарга нь одоо болтол үргэлжилж байна. Шүүх гэр бүлийг албан ёсоор салгаагүй тул Хизер нь хаусандаа амьдардаг ч нөхөр нь түүнд байшингийн буланд дотроо тасалгаатай бас жорлонтой нэгхэн өрөө гаргаж өгчээ. Энд тэрээр хүүхдүүдтэйгээ 10 дахь жилдээ амьдарч байгаа бөгөөд мөнгөгүй тул нүүж чадахгүй байна.  "Чингис" -д шоовдорлогдсон эмэгтэй хэвлэлийнхэнд ганц өрөөгөө үзүүлжээ.

-Дөрвөн давхар байшингийн хамтран эзэмшигч атлаа ердөө ганцхан өрөөнд нь л толгой хоргоддог гээд бодоод үз дээ ... Би ийм л байдалд ороод байна. Одоо надад ямар ч сонголт алга-
Өрөө нь хүүхдийх гэмээр агаад жуулчдын хэрэглэдэг индукцин плитка дээр хоол ундаа хийдэг.  Өмнө нь тэрбумтны эхнэр гэгдэн торгонд хөлбөрч явсан ч өдгөө хажуу өрөө түрээслэдэг оюутны түвшинд амьдарч байгаа аж.

Өрөөнд нь хөргөгч, хоолны жижиг ширээ тавьжээ. "Чингис"-ийн сардаа өгдөг өчүүхэн мөнгө хэрэглээнд нь бараг хүрдэггүй гэнэ.

-Би хүүхдүүдтэйгээ хамт өрөөндөө хооллодог. Байшингийнхаа гал тогоо, зочдын өрөө, усан сан, цэцэрлэг зэрэгт оролгүй 10 гаруй жил болж байна-
"Чингис" эхнэр хүүхдээ бусад өрөөнүүдэд орохыг хоригложээ.

-Роберт хатуу сэтгэлтэй дээрэнгүй хүн. Согтохоороо өөрийгөө монгол гаралтай, Чингисийн удам гэж сайрхдаг-
Гэр бүл салах заргын үеэр Хизер доод тал нь 14 сая доллар авах боломжтой байжээ.  Гэтэл "Чингис" өмгөөлөгчийг нь худалдаад авчихсан гэнэ. Худалдагдсан өмгөөөлөгч нөгөө талд ажиллан заргыг улам сунжруулсаар эцэстээ эмэгтэйг хүүхдүүдийнх нь хамт ийм байдалд оруулжээ.  Энэ байшинд тэрбумтан орос амрагийнхаа хамт экс эхнэр, хүүхдүүдийнхаа нүдэн дээр жаргалтай амьдардаг аж. Хизер тэдний “заваарч” байгааг хүүхдүүддээ харуулахаас ихэд болгоомжилдог гэнэ.

-Гэр бүл салах зарга, тэдний байгаа байдлаас болж олон удаа хэрүүл маргаан дэгдэж байсан. Эцэст нь би залхсан. Одоо өөрийнхөө болон хүүхдүүдийнхээ амар тайвны төлөө тэр хоёртой хэрэлдэж маргалдахаа больсон. Бид нэг байшинд хамт амьдардагч тэдэнтэй тааралдахгүй, харахгүй бас харагдахгүй байхыг хичээдэг-
"Чингис"-ийн одоогийн амраг болох орос бүсгүй Юлия Дыбовская нь 27 настай.

Тэрээр өмнөх эхнэр хүүхдүүдээс нь огтхон ч ичиж зовдоггүй агаад байшингийн эзэгтэй шиг аашилдаг. Ченгиз орос амрагаа ихэд эрхлүүлж тансаглуулдаг. 

Дээрхи киног хийхийн тулд “BBC”-гийнхэн тэрбумтныг хөөрхөн “зальджээ”. Хэвлэлийнхэн эхнэрээсээ салах заргых нь тухай яриа авах  нэрээр байшинд нь орж экс эхнэртэй нь уулзан ярицлага авч бичлэг хийжээ. Кино цацагдсаны дараа  тэрбумтан шүүхэд хандана хэмээн мэдэгдсэн байна.
 

Бичлэгийг ЭНД дар ...

НУУЦ.мн