Нууц мэдээллийн уурхай

Daily Mail-д мэдээлснээр Ливаны Бейрут хотод олон жил гудамжинд амьдарсан орон гэргүйн дээр гараа буглагаараа, хөлөө шагайгаараа тайруулсан эмэгтэй Фатима Отман саяхан 52 насандаа нас баржээ. Тэр хавийнхан өдөр бүр гудамжинд тэргэнцэр дээрээ гуйлга гуйж суудаг хөөрхий талийгаачийг эртнээс мэддэг байжээ. Гэхдээ хаанахын хэн болохыг нь хэн ч хэлж чаддаггүй байв. Зарим хүмүүс хойд нутгаас ирсэн гэдэг. Мөн 1975-1990 он хүртэл үргэлжилсэн иргэний дайны үеэр сумны хэлтэрхийд оногдож гар хөлөө тайруулсан гэж ярьдаг. Уг гудамжинд амьдардаг иргэд зовсон эмэгтэйг өрөвдөж хооллож ундалж зарим нь мөнгө өгдөг байжээ. Заримдаа тэргэнцэртэй нь түрж өгдөг байсан агаад хувийн эд зүйлс нь ганц нэг хувцсаа хийсэн хэдхэн цаасан хайрцаг л гэнэ. Аагим халуун өдөр Фатимаг ундаалж байгаа цэргийн энэхүү зураг цахим болон хэвлэлээр тарсаны дараа тэр хавьдаа бүр ч их нэртэй болж хүмүүсд танигдсан гэнэ.

Гудамжинд тэргэнцэр дээрээ бурхан болсон түүний цогцосыг төрөл төрөгсөдөд нь өгөхийн тулд цагдаа нар эд зүйлсээ хийсэн цаасан хайрцгийг нь ухаад олсон зүйлдээ мэл гайхж цэл хөхөрчээ. Цаасан хайрцагнаас гялгар уутан торонд хийсэн бэлнээр таван сая ливан фунт гарч иржээ. Энэ нь бараг гурван мянган доллар юм.

Харин нь дараагийн гарч ирсэн зүйл нь тэнд байсан хүмүүсийг бүр алдуулах дөхжээ. Энэ нь банкны хадгаламжийн дансны хуулга агаад талийгаач нь 1,7 тэрбум ливан фунт буюу 1,2 сая долларын хадгаламж эзэмшдэг байсан аж.  

Ийнхүү тэр хавийнхан олон жилийн турш долларын саятанг хооллож ундаалж байснаа мэджээ. Цагдаагийнхан төрөл төрөгсөдийг хайсаар хойд зүгийн Айн Аль-Захаб хотоос олжээ. Дуудагдаж ирсэн хамаатнууд нь Фатимагийн цогцосыг  таньсан агаад хэрхэн асар их хадгаламжтай болсоныг нь бодоод олохгүй байна гэжээ.

Тэрээр олон жилийн өмнө Бейрут руу явж тэр цагаас хойш хамаатнуудтайгаа  холбоо тасарчээ.

НУУЦ.мн