Нууц мэдээллийн уурхай

Ерөнхий сайд асан С.Баярт 2008 оны долоодугаар сарын 1-ний асуудлаар хэрэг үүсгэх талаар “Хохирогчдын эрх ашгийг хамгаалах шударга төв”, хохирогчид болон ар гэрийнхэн нь өнөөдөр мэдээлэл хийлээ. Тус холбооноос гашуудлын 10 жилийн ойд зориулан Долдугаар сарын нэгэн ба Оюутолгой гэсэн үндэсний чуулганыг ТББ-ууд хамтран зохион байгуулах гэж буй талаараа дуулгасан. Хохирогчдын холбооны тэргүүн Х.Оюунцэцэг: “2008 оны долдугаар сарын 1-н болсноос хойш арван жилийн хугацаа өнгөрлөө. Тухайн үед 8000 гаруй энгийн иргэдийг хоморголон баривчлахад ихэнх нь насанд хүрээгүй хүүхдүүд байсан. Үүнээс 275 иргэнд шүүхээс хүчээр ял өгсөн байдаг. Оюутолгойн гэрээний асуудлаар одоо мөрдөн шалгагдаж буй Санжийн Баяр гэх хүн МАХН-ын даргаар ажиллаж байсан. Өнөөдрийн нөхцөл байдлыг харж байхад энэ хүн эрүүл мэндийн байдлаар ялаас мултрах гэсэн оролдлого хийж байна. Онц байдлыг далимдуулж галт зэвсэг хэрэглэсэн учраас иргэд амь нас, эрүүл мэндээрээ хохирсон. Тухайн үед зодуулж нас барсан гэж хэлж болохоор эзэнгүй цогцсууд Туул голоос олдож байсан ч тэр талаар мэдээлээгүй. Нийтэд мэдээлснээр таван хүн нас барсан гэж байгаа ч яг хэдэн хүн нас барсан нь тодорхой биш байна. 2008 онд сонгуулийг будлиантуулж засгийн эрхийг авсны дараа 2009 онд Оюутолгойн гэрээг байгуулсан. Тийм учраас С.Баярт Оюутолгойн гэрээний асуудлаар шалгагдаж байгаа энэ үед 2008 оны долоодугаар сарын 1-нд болсон үйл явдалтай холбогдуулан эрүү үүсгэх ёстой. 2008 онд 16 настай байсан хүүхэд өнгөрсөн 10 жилийн хугацаанд БНСУ-д дөрвөн удаа хагалгаанд ороод дахин хагалгаанд орох гэсэн ч зардал хүрээгүй учраас буцаж ирсэн байна” гэлээ.

НУУЦ.мн