С.Эрдэнэ: Ипотекийн зээлийн хүүг урьдчилж авдагийг зогсоохоор хуулийн төсөлд оруулсан
.jpg)
УИХ-ын гишүүн С.Эрдэнэ арилжааны банкуудын зээлийн хүүгийн дээд хэмжээг тогтоох тухай хуулийн төслийг өргөн бариад буй. Энэхүү хуулийн төсөл нь зээлийн хүүгийн дээд хязгаарыг хуульчлах, мөнгө хүүлэхтэй тэмцэх зорилготой гэдгийг хууль санаачлагч онцолж байгаа юм. Тодруулбал, арилжааны банкуудын зээлийн хүүгийн дээд хязгаарыг 18 хувь байхаар хуулийн төсөлд хуульчилжээ. Түүний дотор цалин болон тэтгэврийн зээлийн хүүг 12 хувь байхаар тусгасан байна.Зээлийн хүүгийн дээд хязгаарыг хуульчлах, түүнээс дээгүүр зээлийн хүү тогтоосон тохиолдолд хууль зөрчсөн буюу мөнгө хүүлсэнд тооцох, хариуцлага хүлээлгэх зохицуулалтыг ч мөн тусгажээ. Ингэснээр Монголд бизнес эрхлэхэд таатай орчин бий болох, иргэд ААН, байгууллагууд зээлийн хүүгийн дарамтаас ангижрах гол эрх зүйн зохицуулалт хийх аж.
Тус хууль хэрэгжсэнээр ипотекийн зээлийн нөхцөлд ямар өөрчлөлт орох талаар хууль санаачлагч С.Эрдэнээс тодруулахад, Тэрбээр "Өнөөдөр хэрэгжиж байгаа ипотекийн зээлийн хүү, үндсэн зээлийн эргэн төлөлтийн хувь тэнцүүлсэн зарчим нь иргэдэд дэндүү гэмээр хохиролтой байдаг. Тухайлбал, зээлийн хүүгийн эргэн төлөлт 70 хувь байхад үндсэн зээлийн эргэн төлөлт нь 30 хувь байх жишээтэй. Өөрөөр хэлбэл, банкууд үндсэн зээлийн хэмжээг өндөр байлгаж, зээлийн хүүгээ урьдчилж авах зарчмаар явж байгаа. Үүнийг бид "Мөнгө хүүлэлт" гэж харж байгаа. Тиймээс энэ хуульдаа бүх төрлийн зээлийн хүүг урьдчилж авахыг хориглосон заалт оруулсан. Ингэснээр ипотекийн зээлийн хатуу нөхцөлийг өөрчлөх илүү шударга хувь тэнцүүлсэн зарчимд шилжүүлэх эрх зүйн боломж бүрдэх юм. Иргэд 30 сая төгрөгийн ипотекийн зээл авлаа гэхэд сард 270 орчим мянган төгрөг төлж байгаа. 10 жил энэ маягаар явахад зээл, хүү гээд үндсэндээ 30 гаруй сая төгрөг төлнө. Гэтэл хүүг нь урьдчилж авч байгаа учраас энэ мөнгөний 70 хувь нь хүүнд явж,үндсэн зээлээс нь 30 хувь нь хасагдах жишээтэй. Энэ нь анх зээлсэн мөнгөнөөсөө их мөнгийг эргүүлэн төлсөн ч та их хэмжээний зээлтэй хэвээрээ л үлдэнэ гэсэн үг. Энэ хууль батлагдсанаар уг тогтолцоог өөрчилж, харилцан ашигтай шударга тогтолцоонд шилжүүлэх ач холбогдолтой" гэв.
НУУЦ.мн
