Нууц мэдээллийн уурхай

2018 оны дөрөвдүгээр сарын 14-нд Бөхийн өргөөний гадна 100 орчим залуус цуглан эмх замбараагүй байдал үүсгэж, сүх, лантуу ашиглан хаалгыг нь эвдсэн хэрэг гарсан билээ. Энэ талаарх дуудлага мэдээлэл Баянзүрх дүүрэг дэх цагдаагийн хоёрдугаар хэлтэст 19 цагийн орчимд ирсэн бөгөөд тус дүүргийн жижүүрийн бүрэлдэхүүн хэрэг гарсан газарт очиж цугларсан хүмүүсийг тарааж, шалгалтын ажиллагааг хийж эхэлсэн. Энэ үйл явдлын дараа Улсын начин Б.Одхүү УИХ-ын гишүүн А.Сүхбатыг зодож, биед нь гэмтэл учруулсан гэх мэдээлэл хэвлэл мэдээллийн хэрэгслүүдээр тархсан. Тодруулбал, Бөхийн өргөөг хамгаалалтад авч хэнийг ч дотогш нэвтрүүлээгүй үед УИХ-ын гишүүн, Дархан аварга А.Сүхбатыг Бөхийн өргөөн доторх цоожтой өрөөнд сууж байхад Улсын начин Б.Одхүү 10 гаруй залуусын хамт өрөөг цөм өшиглөн орж бүлэглэн зодсон. Тиймээс УИХ-ын гишүүн А.Сүхбат шүүх эмнэлэгт хандаж, гэмтлийн зэргээ тогтоолгохоор болсон бөгөөд уг асуудлыг БЗД-ийн цагдаагийн хоёрдугаар хэлтэст шалгаж эхэлсэн гэх мэдээлэл гараад буй. Энэ талаар Улсын заан Ц.Магалжаваас дараах тодруулгыг авлаа.

-Монголын Үндэсний бөхийн холбооны удирдлагуудын дунд үүсээд байгаа нөхцөл байдлын талаар товч тайлбар өгөхгүй юу?

-Дөнгөж сая би өөр хэвлэл мэдээллийн байгууллагад мэдээлэл өгсөн. Нэг өгүүлбэрээр хэлэхэд хэцүү асуудал үүсээд байна.

-А.Сүхбат аваргын биед халдсан гэх асуудалд ямар хариулт өгөх вэ?

-А.Сүхбат аваргын биед халдсан асуудал огт байхгүй.

-Бөхийн өргөөний гадна хамгаалалт авсан асуудлыг Р.Нямдорж даргатай холбон тайлбарлаад байгаа. Хамгаалалтад авсан үндэслэл нь юу вэ?

-“Гацуурт” компанийн хөлсөлсөн хамгаалалтын албаны 40 гаруй залуус дөрөвдүгээр  сарын 14-ний өдөр 18 цагийн орчимд Бөхийн өргөөний хаалгыг эвдлэн сүйтгэсэн. Энэ чинь өөрөө асуудлын гол юм шүү дээ. Ийм зүйл болохоос сэргийлээд хамгаалах гэж үзсэн, мөн цагдаагийн байгууллагад хэлсэн. Энэ явдлын дараа цагдаагийн байгууллага хамгаалалтад авлаа. Мөн прокурорын байгууллагаас хяналт тавьж үйл ажиллагааг нь түр хугацаанд зогсоогоод байна. Ийм л асуудал болсон.

-УИХ-ын гишүүн Б.Бат-Эрдэнэ хаана байгаа вэ, энэ асуудлын талаар ямар байр суурьтай байгаа бол?

-УИХ-ын гишүүн Б.Бат-Эрдэнэ одоогоор Хэнтий аймагт ажиллаж байна.

НУУЦ.мн