Нууц мэдээллийн уурхай

Mirror-д мэдээлснээр 23 настай Кейтлин Конли гэдэг бүсгүй Адам Йодер гэдэг залуутай 2011 оноос хойш болзжээ. Тэдний харилцаа улам гүнзгийрч найз нөхөд нь гэрлэх хосын тоонд оруулж ярьдаг болжээ. Хоёр талын эцэг эхтэйгээ танилцсан агаад Адамын ээж 60 настай Мэри Йодер хүүгийнхээ найз бүсгүй, бараг ирээдүйн бэрээ өөрийнхөө хуулийн компанид ажилд авсан гэнэ.

Гэсэн ойр тойрныхоны тэднийг гэрлэнэ гэсэн хүлээлт талаар болж 2014 онд Адам найз хүүхнээ хаясан байна.  Бүсгүй хүүд нь хаягдсан ч ээжийх нь компанид үргэлжлүүлэн ажилласаар байжээ. 2015 оны 6-р сарын 20-нд Мэри Йодерийн бие ажил дээрээ гэнэт мууджээ. Яаралтай эмнэлэгт хүргэсэн ч дотор эрхтнүүдийнх нь ажиллагаа  тасалдаж ухаан алджээ. Сэхээн амьдруулах тасгийн эрчимт эмчилгээнд оруулсан ч хоёр хоногийн дараа бурхан болсон байна.  Түүнийг нас барсаны дараа Кейтлин ирээдүйн хадам ээж нь болох шахсан талийгаачийн тухай цахим хуудсандаа харамсан бичжээ.

-Таныгаа үгүй болсон гэдэгт одоо ч итгэж чадахгүй. Та намайг олон зүйлд сургаж миний амьдралд том нөлөөлсөн хүн-
Талийгаачийн задлан шинжилгээний дүн хоёр сарын дараа гарч хордуулсан гэсэн дүгнэлт гаргажээ. Настай эмэгтэйг цусан дахь чихрийн хэмжээ ихдэхэд  хэрэглэдэг colchicine гэдэг маш хүчтэй эмээр хордуулсан байжээ. Энэ эмийг эрүүл хүнд өгөхөд бие эрхтэнд нь маш хүчтэйгээр цочмог нөлөөлж дотор эрхтнүүдийн үйл ажиллагааг гэмтээх зогсоох аюултай байдаг гэнэ. Мөрдөгчид эхлээд амиа хорлолт хэмээн үзэж  мөрдлөг явуулсан ч энэ таамаглал нотлогдсонгүй. Дараа нь талийгаачийн нөхөр Биллийг сэжиглэжээ. Гэтэл цагдаагийн газарт талийгаачийг хүү Адам нь хордуулсан, хордуулсан эм нь машинд нь байгаа гэсэн бичиг үл мэдэгдэх хүнээс иржээ.  Цагдаа нар шалгасан боловч хүүд ээжийгээ хөнөөх ямар ч шалтгаан байхгүйн дээр гэмт хэрэг үйлдсэнээ нотлох баримтаа машиндаа хадгалах нь үнэмшил муутай сонсогдож байжээ. Захиа  болон захиа илгээгчийг олж тогтоох мөрдлөг удтал үргэлжилсэний эцэст хамаг сэжиг таавар Адамын экс найз бүсгүй Кейтлин дээр буужээ. 

Бүхий л шинжилгээгээр захиаг хаягдсан бүсгүй бичсэн болох нь тогтоогдсон байна. Бүсгүй ч хэргээ хүлээж хүүд нь хаягдсандаа хорсохдоо ээжийг нь хордуулж хөнөөн хариугаа авсан гэжээ. Саяхан Англид энэ шуугиант хэргийн шүүх хурал болж хонзогногч бүсгүйд 23 жилийн хорих ял оноосон байна.

НУУЦ.мн