Нууц мэдээллийн уурхай

Хятадын тэрбумтан Чень Шен төрсөн тосгоныхоо бүх айлд тансаг хаус барьж бэлэглэсэн тухай манай цахимд шуугисан. Тэгвэл өдгөө тэрхүү тансаг хауснуудад нь одоо болтол нэг ч айл ороогүй агаад балгас болж байгаа тухай ОдитиСентрал сайтад мэдээлжээ. “Tiandi No 1 Beverage Inc” корпорацийг үндэслэгч тэрбумтан нь Гуандун мужийн Гуаньху тосгонд төржээ.  Нэгэнт баяжсан тул төрсөн тосгоныхондоо буян хийхээр шийдэж айл бүрийг орчин үеийн хаусанд оруулах төсөл санаачилан 2014 оноос эхлүүлсэн.

Тэр үед тосгон нь албан ёсны бүртгэлээр 190 өрхтэй байсан тул 190 хаус барихаар болжээ.  Төсөл ёсоор хаус бүр нь 280м2 талбайтай, гурван давхар, таван унтлагын өрөөтэй, хоёр жорлонтой, хоёр гарааштай баригджээ. Хауснууд дундуур горхи урсаж хэд хэдэн байрны дунд спортын талбай барьж байжээ. Мөн хүүхдийн тоглоомын талбай цэцэрлэгийг ч мартсангүй.

Гэтэл хаус үнэгүй өгч байгаа мэдээллээр тосгоноо орхин явцгаасан гэр бүлүүд олноороо буцаж иржээ. Ингээд өрхийн тоо нэмэгдсэн тул тэрбумтан ахиж 69 хаус нэмж барихаар төлөвлөж төслийн нийт өртөг нь 200 сая юань буюу 31 сая долларт хүрчээ. Харин энэ үеэс эхлэн тосгоныхон дунд өдгөө хүртэл үргэлжилж байгаа хэрүүл маргаан дэгджээ.

Олон хүүхэдтай айлууд нь нэмж нэг хаус авна хэмээн шаарджээ. Тэд цөөн хүүхэдтэй өрхтэй адил хэмжээний м2-тай хаустай болохгүй гэж бухимдацгаасан байна. Түүнээс гадна насанд хүрсэн хүүхэлтэй айлууд удахгүй гэрлэх хүү/охиндоо бас байр нэхэж эхэлжээ. Мөн тосгондоо үлдсэн “уугуул” суугчид болон хаусны сургаар буцаж ирсэн нүүж явагчдын дунд сөргөлдөөн үүсжээ. Уугуул суугчид буцаж ирэгсэдэд хаус өгөхийг эсэргүүцэж тэдгээр байрнуудыг хүүхдүүдээ авна гэжээ.

Атаас жөтөөч зангаас үүдэлтэй хэрүүл тэмцэл бүр хурцдаж  тосгоны зөвлөл байдлыг зохицуулж чадахгүй болсон тул өглөгийн эзэн тэрбумтнаас шударгаар хувиарлалт хийхийг шаарджээ. Тэрбумтан асуудлыг шийдэхээр 2015 онд төрсөн тосгондоо очсон ч толгой сэгсрэн зугтах шахам буцаж иржээ.

-Тэд, нөхцөл байдлыг ойлгохыг хүсээгүй, бүгд л өөртөө 2-3 хаус авах гэж тал талаас над руу дайрсан. Тэрнээс хойш би ахиж тосгондоо очоогүй-
Тосгоныхны өөдгүй занд гомдсон тэрумтаны урам хугарч төсөл удааширчээ. Нутгийн залуусаа ажилтай болгохын тулд тосгоны хажууд орчин үеийн гахайны том ферм байгуулахаар төлөвлөж байснаа ч зогсоосон байна. Өдгөө барилгын ажил бараг зогсоод байгаа гэнэ.

Оршин суугчид нь нэгдсэн тохиролцоонд хүрч чадалгүй гуравдахь жилдээ маргалдаж байгаа тул нэг ч айл хаусандаа ороогүй, байр эзэмших гэрчилгээгээ ч аваагүй байна. Харин энэ зуур тансаг хаусны хороолол балгас болж эхэлжээ. Эзэнгүй хауснууд түрүүчээсээ тоногдож шил, шал дээвэр зэрэг нь хулгайд алдагджээ. Урам зориг нь мохсон тэрбумтан төрсөн тосгоны иргэдээ орон сууцжуулах төслөө урагшлуулах сэтгэлгүй болсон гэнэ.

НУУЦ.мн