У.Хүрэлсүхийн Засгийн газарт “АМЬД” харилцаа үгүй болжээ
Энэ нь Засгийн газрын кабинетын зарчим алдагдаж байгаагийн нэг шинж юм. Амьд ажил хэрэгч, нүүр тулсан байдлаар өрнөх учиртай Засгийн газрын хурал зөвлөгөөний учир утга алдагдаж үл ойлголцсон, үл итгэсэн, түншсэн тандсан байдалтай явагддаг болсон байна. Харин үүний оронд Ерөнхий сайд болон сайд нар нь цахим сүлжээ хэвлэлээр бие биентэйгээ харьцдаг болсон. Үүний ойрмогхоны нэг жишээ нь У.Хүрэлсүх сайд Н.Цэрэнбатыг цахим сүлжээгээр загнасан явдал юм. Тэгвэл бас нэг сайд Ж.Бат-Эрдэнэ “МИАТ”-ийн захирлыг солиход минь Ерөнхий сайд нөлөөлөхгүй” гэж хэвлэлээр мэдэгдэв. Ингэж хэвлэлээр дамжуулсан нь ч бүр гайхал төрүүлэм. Эхний хувилбараар сайд төрийн өмчит компаний захирлаа өөрөө толгой мэдэж томилох хүсэлтэйгээ Ерөнхий сайдынхаа нүүр лүү харж байгаад хэлж чадахгүй, харин хэвлэлээр дамжуулан дуулгаж “зөвшөөрөл” хүсэж байгаа гэмээр ... Эсвэл “МИАТ”-ын ерөнхий захирлын томилгоонд Ерөнхий сайд болон өөр бусад бүлэглэлүүд оролцвол дэмий шүү хэмээн айлгаж мэт ... У.Хүрэлсүх Засгийн газраа байгуулахдаа “номхон тэмээ ноолоход амар” гэдэг үгийг дагасан. ЗГХЭГ-ын даргаас эхлээд л олон жил гарых нь дор явсан чих зөөлөнтөй хүмүүсыг сонгож сайд болгосон. Ийм ч учраас сайд нар нь бие даан томилгоо хийхээс айж хэвлэлээр дамжуулан дуулгаж байгаа нь энэ бололтой. Ярилцлагаас үзэхэд Ж.Бат-Эрдэнэ “МИАТ”-ынханд нэлээд хатуурхах нь гэдэг “одоогийн удирдлага улстөржиж байна”, ажилтнууд нь дунджаар гурван сая төгрөгийн цалин авч байна. Хэн нэгэн дарга, сайдын 'шахааны хүн' ажилладаг гэдэг зүй бус байдлаас бүрэн салаагүй нь харагдаж байна” гэх мэт үгнээс нь тодорхой харагдлаа. Харин Ж.Бат-Эрдэнэ сайдын яамандаа очоод ганц зөв хийсэн ажил нь дэд сайд Б.Цогтгэрэлийг байх ёстой байранд нь тавьсан явдал юм. Үүнийгээ ч “дэд сайд бол миний хэлсэн үг, хэрэгжүүлэхээр тодорхойлсон бодлогын араас дандаа хөөж гүйцэтгэлийг хангах үүрэгтэй хүн” гэснээр харагдав. Харин өмнөх сайдын үед Шилэн Цогоо нь өөрийнхөө тодорхойлсон бодлогийн араас явж сайдынхаа өмнө алхалдаг, сайдынхаа өмнөө ярьдаг байсан. Одоо ч тэр цагаа санан санаа алдан суугаа байх даа ...
НУУЦ.мн
