Нууц мэдээллийн уурхай

Сар шинийн баярын өмнөхөн шинэ жилийн өмнөх өдрүүдээс дутахгүй олон алдартан төрдөг жамтай. Гэхдээ сайн малчин, уяач гээд голдуу адуу маланд ойрхон явдаг нөхдүүдээс тодордог. Гэхдээ уяачдын тухайд адуунаас хол явдаг хол байдаг ч алдарт болдог хачирхалтай жишиг тогтоод байна. Морь унадаггүй, бүр уядаг ч үгүй таахалзсан  торгон дээлтэнгүүд гэнэтхэн энгэрээ цоолдог.  Энэ жилд гэхэд Миегомбын Энхболд хүү Анар, алдарт “сугардаггүй” Д.Сугар нар алдарт уяачид тодорхойлогдож байгаа гэнэ. Цэцийн нөмрөөс гардаггүй “сугардаггүйн” дэргэд Их хурлын даргын цэмцгэр цагаан хүү нь морь маланд арай ойр явдаг гэнэ. Гэхдээ адууны бэлчээр уяан дээрээс бус төрийн ордон хавиар морины асуудал хөөцөлдөж эрлийз морийг уралдуулахгүй байх шийдвэр гаргах тал дээр “нөлөөлж” байжээ. Энэ тухай Ерөнхийлөгчтэй улстөрийн нууц харилцаатай гэсэн хэрэгт унаад сандарч байсан “Топор” хэмээх У.Хүрэлсүх ам алдаж байсан. Түүний өөртөө наагаад байсан монгол наадмаар монгол адуугаа уралдуулсан гэх гавьяа чухамдаа даргын хүүгийх болж таараад байна. Үүгээрээ алдарт уяач болох гавьяатай бололтой. Мөн даргатан улстөрийн ажлаа охиндоо, уяачдын холбооны ажлаа хүүдээ хувиарлан өгсөн аж.

Харин ҮХЦ-ийн гишүүн Д.Сугарын тухайд морь уядаг гэж сонин хэвлэлд гараагүй. Харин МИАТ-ын хэрэг, Япон дахь үл хөдлөх хөрөнгө, Эрдэнэт үйлдвэрийг барьцаанд тавьсан гэх мут шуугианд холбогдон хэвлэлийн тэргүүн нүүрэнд олонтоо заларсан. Өдгөө алдар гэдэг цолыг морины эзэнд бус харин уяасан уяачид нь өгөх хэрэгтэй. Харин эзэн баячуудад  нь хурдан морьтой алдартай хүн гэх мэт цол өгч болох юм.