Нууц мэдээллийн уурхай

Сүүлийн үед Ерөнхийлөгч Х.Баттулга Ерөнхий сайд У.Хүрэлсүх нар олон асуудалд санал зөрөлдөж явна. Ерөнхийлөгч Солонгос руу чиглэсэн их нүүдлийг зогсооно гэсэн бол Ерөнхий сайд нь харин ч эсрэгээр нь Солонгосд ажиллах монгол иргэдийн квотыг нэмэгдүүлэхийг гуйгаад ирсэн. Ерөнхийлөгч Тавантолгойн нүүрсийг Оросоор дамжуулж Японд зарна гэсэн бол Ерөнхий сайд энэ ордыг зөвхөн Хятадтай хамтарч ашиглана гэв. Энэ мэтээр зөрөлдөж байгаа ч урьдын “Топор” нөхөрлөл нь байсаар л байна. Өдгөө тэд энэ жилийн Цагаан сарын бөхийн барилдааныг Ерөнхийлөгчийн “төрсөн нутаг” Яармагийн дэнж дэх спорт цогцолборт хийхээр санал нэгдэж Бөхийн холбооны Р.Нямдоржийг шахаж эхэлжээ.

Харин хэр баргийн юмнаас айхаа больсон тэргүүнтэн тийм ч амар бууж өгөхгүй бололтой. Цагаан сарын бөхийн барилдаан нь цаанаа сар их мөнгийг дагуулдаг.  Энэ барилдааныг найраагүй гэдэг утгаар нь л бөх сонирхогчид үзэх гэдэг тул 10 мянган төгрөгийн үнэтэй тасалбар нь 50-100 мянга ч хүрч байсан удаа бий. Хэрвээ энэ удаад байрлал шилжвэл оз ашгаа алдах хүмүүсийн тоонд  Бөхийн өргөөг шимээд сурчихсан шагчид орно. Иймд тэмцэл нэлээд ширүүн болох төлөвтэй. Ерөнхийлөгч Бөхийн холбоо хоёрын тулаанд өдгөө ЕТГ-ын дэд даргаар ажиллаж буй Г.Байгальмаа хүнд байдалд оржээ. Тэрээр дэд тэргүүн Д.Данзаны хамаатан болох Гочоосүрэн зааны охин тул хэний талд орохоо мэдэхгүй байгаа гэнэ.