Нууц мэдээллийн уурхай

Өнгөрсөн онд манай “хүнд гаруудын” ахмад төлөөллөөс хоёр нь асуудалд холбогдсон. “Доён” хэмээх Болд туулын эрэгт буудсан бол Сэлэнгийн Баатаржав нь  Дорноговь аймгийн Сайхандулаан сумын нутаг Баянхошуу гэх газар байх алтны уурхайд алт ухах зөвшөөрлийг холбогдох хүмүүсээс олж өгнө хэмээн Өмнөговийн Баттулга, Төрхүү нараас 80 сая төгрөг авчихжээ. Баттулга нутгийнхаа Цогзол гэх хүнээр дамжуулан Баатаржавтай танилцжээ. Дараа мөн л нутгийнхаа Наранцогтын хамт Баатаржавыг даган  Сэлэнгэ аймгийн Зүүнхараа суманд очсон гэнэ. Өмнөговийнхон алтанд хөрөнгө оруулах буюу алтны уурхайнаас овоолго шороо авч угаах төлөвлөгөөтэй байжээ. Энэ зэргийн бизнес хийх хөрөнгөтэй агаад Баттулга нь том дэлгүүртэй, Оюутолгойд бараа нийлүүлэгч бол Наранцогт нь Ханбогд суманд ШТС-тай гэнэ. Тэд  Дорноговь аймгийн Сайхандулаан сумын нутаг дахь алттай газар байгааг хэлэхэд  Сэлэнгийн эр тэр газарт чинь оруулж чадна, 100 сая төгрөг гарга гэжээ. Өмнөговийнхон  эхлээд 50 сая төгрөг бэлдээд 11-р хороололд Баатаржав болон эхнэртэй нь уулзаж  мөнгөө бэлнээр өгчээ.   Мөнгөө өгсөний дараа хамтдаа алт гарсан Сайхандулаан сумын нутаг очсон ч хамгаалалтын албаныханд хөөгдөөд буцжээ.  Аймгийн төвд ирээд Баатаржав нь ганцаарчилан Засаг дарга болон албаны чухал хүмүүстэй уулзсан гэнэ. Ердөө 15-хан минутын дараа буцаж ирээд бүх юм бүтсэн, албаныхан бидэнд морь нохой мэт зүтгэхээр болсон гэсэн баяртай мэдээ хэлжээ. Ажил нь бүтсэн тул хот руу буцжээ. Хотод ирсэний дараа дулаарахаар нөгөө газар луугаа очно, техник хэрэгсэл, ажилчдаа бэлд гээд Өмнөговийхнийг буцаажээ. Ханбогддоо ирээд байхад эхнэр нь утасдаж машин техникээ маргааш хөдөлгө, бүх юм бэлэн болсон, одоо үлдэгдэл 20 сая төгрөгөө банк хаахаас өмнө шилжүүл гэсний дагуу мөнгийг нь шилжүүлсэн байна. Ингээд экскаватор, трейлер, ажилчдаа түрүүлж явуулаад өөрсдөө араас нь сумлагч машинаа дагуулаад Дорноговийн Сайхандулаан сум руу дөхөж иртэл ажил бүтэхээ байлаа, техникээ буцааж татаад өөрсдөө хотод хүрээд ир гэжээ. Хотод ирэхэд нь нөгөө газар хойшлогдлоо, оронд нь Сэлэнгийн Баруунхараад алттай газар оруулна, техникээ бэлд гэжээ. Өмнөговийн мөнгөө өгсөн хоёр Гурвалжингийн гүүрнээс экскаватор, трейлер хөлслөхөөр бэлдээд хүлээж байтал гэнэт холбоо тасарчээ. Баатаржав төдийгүй нутгийн Наранцогт нь ч утсаа авахаа байсан гэнэ. Ийнхүү залилуулж байгаагаа ойлгож мөнгөө нэхэж эхэлжээ. Сэлэнгийн эрийн тухайд цагдаад хандаад дэмий, дээгүүрээ танил тал ихтэй, эвийг нь олоод мөнгөө салгаж ав хэмээн тал талаас нь зөвлөсөн тул цагдаад хандалгүй есөн сар хүлээсэн байна. Гэсэн ч ердөө 24 сая төгрөг л буцааж авч чаджээ. Мөнгөө нэхэхэд маш зуунги дарамталсан өнгөөр ярьдаг, хамт яваа хүмүүсийг нь айлгаж сүрдүүлж байжээ. Сүүлдээ алтны уурхайн хамгаалалтын албаныханд хахууль өгч шороо аван хууль бусаар алт угаах гэсэн хэмээн өөрсдийг нь эргүүлээд хүнд байдалд оруулсан тул өмнөговийнхон нэлээд айдастай явжээ. Харин Сэлэнгийн эр өмнөговьчууд өөрсдөө л эхэлж Дорноговийн Сайхандулаан сумын алттай газрын тухай мэдээлэл өгсөн гэжээ. “Тэр газрын хүмүүс таныг таньж байна, та хөөцөлдөөд өг” гэжээ. Бүр хэн ч танаас булааж чадахгүй тул гарсан алтыг та хадгал гэсэн гэнэ.  Өгсөн мөнгийг нь ажил хөөцөлдөх үйл ажиллагааны зардал гэж ойлгожээ. Өөрийг нь шийдвэр гаргах эрхгүй хүн гэдгийг мэдсээр байж л мөнгө өгөөд байсан аж. Мөн Дорноговийг Япон лугаа хөгжүүлнэ хэмээн аймгийн Засаг даргаар найман жил ажилласан П.Ганхуяг Сэлэнгийн Баатаржавтай уулзаж байсан гэж мэдүүлжээ. 

 

 

НУУЦ.мн