Нууц мэдээллийн уурхай

Адуу нь хонхор дүүргэж байвал бүрэн гэж үздэг баяны тухай үлгэр байдаг. Энэ нь асуудлын гүнд нь ордоггүй, бүдүүн тоймоор хэмждэг, барагцаагаар ярьдаг хүний жишээ  юм. Утааны уг үндэстэй нь биш үр дагавартай нь тэмцэж байгаа У.Хүрэлсүхийн Засгийн газар мөн л барагцаагаар л ярьж байна.  Ерөнхий сайдын тушаалаар 113 ширхэг уурын зуухыг буулгажээ. Эдгээр уурын зуух нь жилд 40 мянган ширхэг портер машин нүүрс түлдэг байжээ.  Уг нь манай улс куб.метр, тонн гэдэг хэмжүүртэй атал Ерөнхий сайдын ажлын алба портер гэдэг машиныг албан ёсны хэмжигдэхүүний нэгжээр авсан байна.  Үүнээс үзэхэд хотод байгаа уурын зуухнуудын жилийн хэрэглээний нүүрсний тонн хэмжээний бодит тооцоо судалгаа Ерөнхий сайдад алга. Ер нь гэр хорооллын жилийн хэрэглээний нүүрсний нарийн тоог мэдэж байгаа эсэх нь эргэлзээтэй байна. Дүүргийнхэн барагцаалаад нийтдээ 40 мянган  ширхэг портер нүүрс түлдэг гэснийг  ажлын алба нь уухайн тас шүүрэн авч тэр чигээр нь нийтэд зарлаж сууна. Утаатай нарийн судалгаа, тооцоотой тэмцэх учиртай. Тооцоо судалгаагүй муйхраар хандвал дундаас нь шамшигдуулах боломж нээгддэг.  Алдарт “Цэвэр агаар” сан ингэж л  хулгайны үүр болсон. Тэгээд ч Ерөнхий сайдын ажлын алба портероор барагцаалдаг нүүрс зардаг захынхан биш тул төрийн албаны соёлтой ажиллах учиртай. Олон нийт  Ерөнхий сайдыг гэр хорооллоор явж уурын зуух хаалгах биш харин ТЭЦ-5-ыг бариулахыг шаардаж  байна.  Уурын зуух хаах нь дүүргийн Засаг даргын ажил.

 

 

NUUTS.mn