Нууц мэдээллийн уурхай

Тус сумын удирдлагууд ажилгүй иргэдээ ажилтай болгох, амьжиргааг нь дээшлүүлэх зорилгоор “Бортолгой”, “Нарт” гэх газруудад алтны тээрэм ажиллуулж иржээ. Алтны тээрэм хувь хүнийх байдаг. Тэнд том, жижиг нийлсэн 10 гаран алтны тээрэм ажиллаж алтаа “Нарт” уулын хэсгээс олборлодог гэнэ. Зөвшөөрлөөр ажиллуулж байгаа гэх ч үзүүлэх зөвшөөрөл байдаггүй, сумын Засаг даргатай аман гэрээтэй гэж л ярьцгаадаг. Алтны тээрмүүд мөнгөн ус ашиглаж байна гэсэн мэдээлэл ирсэний дагуу тагнуулынхан энэ зун гэнэтийн шалгалт хийжээ. Шалтгалтаар “Бор толгой” дахь Р.Хурцэцэгийн  алтны тээрмээс мөнгөн ус гарч иржээ. Мөнгөн усыг нь хөөрхөн адал явдалтай илрүүлжээ. Алтны тээрмийн эзэн эмэгтэйн мэдүүлснээр бор савтай юмыг туслах ажилчин Ганбаа ах нь бодвол хээрээс олоод ирсэн гэнэ. Мөнгөн ус гэдгийг нь мэдээгүй тулд нэг газар тавьчих гэжээ. Харин шалгалтынхан ирэхэд гэнэт нөгөө зүйлээ мөнгөн ус байж магадгүй хэмээн санаад бушуухан далд хий хэмээн туслах ажилтандаа тушаажээ. Харин туслах ажилчин нь шал өөр зүйл мэдүүлжээ. Тэрээр энэ оны 5-р сараас алтны тээрэм дээр ажиллаж байгаа аж. Ажилд орсноос хойш 3-4 хоногийн дараа эзэн Хурцэцэг нь “энэ мөнгөн усыг далд хийчих” гээд бор өнгийн жижиг хуванцар савтай зүйл өгсөнийг нь шүүгээний ар талаар нуужээ. Удалгүй чулуу тээрэмдүүлэх гэсэн хэсэг хүмүүс иржээ.  Гэтэл тэр хүмүүс нь мөнгөн ус хайсан шалгалтынхан байж таарсанд эзэн нь самбаачилан "шалгалт ирчихлээ, нөгөө мөнгөн усаа нэг газар сэмхэн нуучих” гэхээр нь савтай мөнгөн усаа сэм  аваад гарч хашааны зүүн хойд буланд газарт булж нуужээ. Харин түүнийг шалгалтын сонор сэрэмжтэй ажилтан олж харжээ. Араас нь очиход туслах ажилчин банз сугавчилаад угтжээ. Юу хийснийг нь асуухад банз авах гэсэн юм гэжээ. Ингээд шалгалтынхныг дуудан банз байсан хашааны буланг ухуулахад нуусан савтай мөнгөн ус нь гарч ирсэн байна.

 

 

НУУЦ.мн