Нууц мэдээллийн уурхай

Хятад руу наймаа хийдэг Б.Н гэдэг эмэгтэй чонын ходоод 11 ширхэг, чонын гурван толгой, бугын ясан эвэр 20кг, хүдрийн заар тав, чоны чив дөрвийг гаргах гээд баригджээ. Түүнтэй хамт “Өндөр-Ижий” гэдэг зоогийн газрын эзэн С.М явжээ.  Б.Н нь найман ширхэг чонын ходоодыг Эрдэнэтийн зах дээрээс Бооёо гэдэг хүнээс  70 мянган төгрөгөөр авчээ. Хүдрийн заарыг Чулуунцэцэгээс граммыг нь 17 мянган төгрөгөөр тооцож нийтдээ 2,8 сая төгрөгөөр авсан гэнэ. Бугын ясан эврийг 400 мянган төгрөгөөр авсан бол чонын дөрвөн чивийг 200 мянган төгрөгөөр авчээ. Юмаа цуглуулаад зоогийн газрын эзэнтэй вокзал дээр уулзаж хамтдаа Замын-Үүд явжээ. Ирээд тус зоогийн газарт ажилладаг дүүгийндээ буусан байна. Хил гарахдаа бугын эвэр, чонын ходоод, чивээ цүнхэндээ нуужээ. Хамгийн үнэтэй болох хүдрийн заараа гадуур хувцасныхаа халаасанд хийгээд вагонд суужээ. Гэхдээ тэдний талаархи мэдээлэл алдагджээ. Мэдээлэл авсан цагдаа нар купенд нь гэнэт орж ирэн шалгажээ. Цагдаагийнхан орж ирэнгүүт хар уутанд хийсэн хүдрийн заараа зоогийн газрын эзэнд өгчээ. Тэр нь аваад шууд хөхөвчиндээ нуусан гэнэ. Журмын дагуу тэднийг эмэгтэй цагдаа нэгжжээ. Эхлээд Б.Н-ийг нэгжээд дараа нь зоогийн газрын эзний ээлж болоход сандрахдаа хөхөвчнөөсөө шууд гаргаад өгчээ. Тэрээр хамт яваа хүнээ хориотой бараатай явааг огт мэдээгүй гэж мэдүүлэг өгчээ. Бүр хотоос хамт ирсэн атлаа бугын чив, хүдрийн заар байгааг огт мэдээгүй гэнэ.  Цагдаа орж ирэхэд “өндөг байгаа” гээд хар ууттай юм өгөхөд нь ууттай өндөгийг “сандрахдаа” хөхний даруулгандаа хийгээд бурууджээ. Ингээд огт гэм зэмгүй байж хилсээр хоригдон цагдаагийн үүд сахиж  хэлмэгдсэн гэнэ. Н.Б ч сайн эмэгтэй тул найзыгаа хэрэгт огт хамаагүй хэмээн хамгаалжээ. Хүдэр, буга нь нэн ховор, ховор амьтад юм.  Хураагдсан таван заар нь баданга хүдрийн эрэгчинийх болох нь тогтоогджээ. 20 кг эвэр нь таван халиун бугынх байжээ. Эврийг хөрөдөөдөж жижиглэсэн нь 89 ширхэг болжээ Экологийн үнэлгээгээр хүдэр нь гурван сая, халиун буга нь 6,6 саяар үнэлэгддэг аж. Хэрвээ хилээр гаргаж чадсан бол Баатар гэдэг өвөрмонголд зарахаар төлөвлөжээ. Монголчууд Эрээний захын үүдэнд байнга эргэлддэг түүнд л бугын эвэр зэргээ  өгдөг аж.