Эцэг эхийг нь шоронд суулгасан ЦАГДАА хүүг нь төрсөн өдрөөр нь БАЯРЛУУЛЖЭЭ
Нийтэлсэн: 2017-10-26 07:26:47
Висконсин мужийн Грийн Вэй хотын дунд сургуулийн багш нарын бичсэн пост цахимд алдаршиж байна. Тус сургуулийн бага ангийн нэгэн сурагчийн эцэг эх хар тамхины хэргээр баривчлагдан найман жил хорих ялаар шийтгүүлжээ. Хүүг хамаатнуудых нь асрамжинд шилжүүлсэн байна. Саяхан хүүгийн төрсөн өдөр болжээ. Гэтэл үүнийг асрамжилан хамгаалагчид нь, багш ангийн найз нар нь мэдээгүй байжээ. Тэр өдөр хотын цагдаагийн газрын мөрдөгч Даррил Робинсон сургууль руу залгаж хичээл тарах үеэр хүү дээр очино гэдгээ хэлжээ. Харин төрсөн өдрийн бэлэг барьсан цагдааг хараад багш нар нь хүүгийн төрсөн өдөр болохыг мэджээ. Цагдаа хүүд баярын мэнд хүргэж бэлгээ гардуулаад дагуулан МакДональдсд оруулан дайлж дараа нь паркад тоглуулаад гэрт нь хүргэж өгчээ.
Хүү цагдааг таньж байсан гэнэ. Учир нь тэрээр аав ээжийг нь баривчлахаар гэрт нь ирсэн аж. Сүүлд багш нарын олж мэдсэнээр Даррил Робинсон нь хар тамхи зардаг эцэг эхийг нь гардан мөрдөж илрүүлсэн байжээ. Мөн шүүхэд шилжүүлэн гэм бурууг нь баталжээ. Гэхдээ тэрээр хорих ял авсан эхнэр нөхрийн ард ганц хүү нь үлдсэн гэдгийг мэдэж байсан агаад эцэг эхийх нь өмнөөс баярлуулж байгаагаа хэлжээ.
NUUTS.mn
