Нууц мэдээллийн уурхай

“Эх нь шийр алаг бол унага нь хээр алаг” гэж үнэн аж. Н.Номтойбаяр баавгай агналаа, хутгаа далайлаа, хүн мөргөлөө гээд байнга хэл аманд ордог. Тэгвэл Дорнод аймаг дахь “МАК” компаний инженер Б.Хатанбаатар нь Хэрлэн сумын ИТХ-ын төлөөлөгчөөр сонгогдсоны баяраа тэмдэглээд гарахдаа  хүний хөл хуга хавсарчээ. Н.Номтойбаяр гарандаа бяртай бол инженер хөлөндөө бядтай аж. Инженерийг төлөөлөгчөөр сонгогдоход нь найзууд нь “Ханан булаг” гэдэг зоогийн газарт урьж баярыг нь тэмдэглэжээ. Тэр ердөө хоёрхон лонх шар айраг уусан гэнэ. Хохирогч О.Э нь ядаж байхад шинэхэн төлөөлөгчтэй шүргэлцжээ. “Яагаад мөрөөрөө явж байхад шүргээд байгаа юм бэ” гэхэд төлөөлөгч “яадаг юм, п-да минь” гэж хараажээ. Ингээд барьж аваад л хавсраад унагажээ. Газар унахад хөл нь “тас” гэж дуугарчээ. Унасан байхад төлөөлөгч цээжин дээр нь өвдөглөөд босохгүй байсан гэнэ. Ийнхүү ардынхаа төлөө зүтгэх ИТХ-ын төлөөлөгч жирийн ардад жинхэнэ төрхөө харуулжээ.

Энэ үед азаар араас нь хүүхнүүд “Хатнаа явъя” гээд дуудахад л босжээ. “Хөл хугалчихлаа шүү дээ” гэхэд “битгий баашлаад бай” гээд тоолгүй машиндаа суугаад явжээ. Хохирогч босож чадалгүй хагас цаг гаруй орилж хэвтсэн гэнэ. Эмнэлэгт очоод тэр шөнөдөө ч өвчиндөө орилж хаширч хоножээ. Түүний хөлийн яс хоёр газраа буюу хөлийн шагайн дээгүүрээ, өвдөгний доогуур холбоос яс хугарчээ. Мөн шагайн орчим яс нь бяцарсан гэсэн. Хотод ирж хөлөө цоолуулж өрөмдүүлж, алхдуулж бие болон сэтгэл санаагаараа хохирчээ.  Хохирогч хавсарч унагачихаад хаяад явсанд нь аймгийн боловсролтой залуусын нэг гэгддэг төлөөлөгчид ихэд гомджээ. Мөн хуулийн байгууллагад шууд хандахаас түдгэлзэн нэлээд удаан харзнаад эцэст нь гомдол гаргажээ. Шүүх саяхан энэ хэргийг хэлэлцээд Хэрлэн сумын ИТХ-ын төлөөлөгчид албадан ажил хийлгэх ял оноожээ. Тэрээр МАН-аас сонгогдсон. Дорнод аймгийн Ардын намынхан дунд зодолдох нь байдаг л зүйл. Ш.Ёл гээд нударгалцаж байсан нөхөд олон бий. Өмнөх дөрвөн жилд аймгийн ИТХ-ийн хуралдаан нь бараг зодоон шиг юм болж байсан. Харин шийтгүүлж байсан удаагүй. Удахгүй Ардын намаас сонгогдсон төлөөлөгч ардынхөө төлөө олон нийтэд тустай хөдөлмөр хийж байхыг харах завшаан дорнодчуудад таарах нь. Аймгийн Ардын намыхнаас ядаж нэг нь ч гэсэн нийтэд тустай ажил хийвэл аштай юу даа ...