"Шилэн Цогоо" төмөр замаас МАШИН, ШАТАХУУНААР хангуулдаг нь тогтоогджээ
Нийтэлсэн: 2017-10-11 05:48:23
.jpg)
Авлигатай тэмцэх газрын Олон нийтийн зөвлөлөөс цаг үеийн асуудлаар мэдээлэл хийлээ. Тус зөвлөл нь өнгөрсөн есдүгээр сарын 23-наас ажлаа эхэлсэн бөгөөд энэ хугацаанд иргэдийн зүгээс 28 өргөдөл гомдол иржээ. Иргэдээс ирсэн зөрчил, гомдлын хамгийн ноцтой нь УБТЗ-ын удирдлагуудтай холбоотой асуудал байжээ. Тухайлбал, тус байгууллагын удирдлагуудыг томилохдоо ашиг сонирхлыг зөрчилгүй гэх тодорхойлолтыг гаргаагүйн дээр ял эдэлж байсан хүмүүс ажиллаж байсан нь тогтоогдсон талаар мэдээллийн үеэр хэллээ. АТГ-аас энэ асуудалд анхаарал хандуулж, тэдгээр хүнийг халах шийдвэр гаргасан байна. Харин энэхүү шийдвэрийн хэрэгжилттэй АТГ болон Олон нийтийн зөвлөлөөс танилцахад тэдгээр албан тушаалтнуудыг орлогч болгон албан тушаалыг бууруулан ажиллуулж байжээ. Мөн "Зам тээврийн хөгжлийн яамны дэд сайдын үүрэг гүйцэтгэгч Б.Цогтгэрэл /шилэн Цогоо/ төмөр замаас машин унадаг, бензин тосоор хангуулдаг байсныг АТГ-аас тогтоосон ч одоо хүртэл зөрчлийг арилаагүй байгаа" хэмээн Олон нийтийн зөвлөлийн дарга Г. Баасан хэллээ. Энэ нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн хоёр заалтыг ноцтой зөрчиж байгаа аж.
Олон нийтийн зөвлөлийн мэдээлж буйгаар нийт иргэдээс ирсэн гомдлын 80 хувь нь албан тушаалын хууль зөрчсөн, албан тушаалаа давуулан ашигласан зөрчил илэрчээ.
НУУЦ.мн
