Нууц мэдээллийн уурхай

МАН-ын Бага хурлаас дэмжигдсэн У.Хүрэлсүх ирэх Ерөнхий сайдаар томилогдох нь тодорхой боллоо. Түүнийг дэмжигчид цаг үеийн шаардлагаар тодорсон баатар, нийгмийн захиалгаар гарч ирсэн удирдагч хэмээн өргөмжилж байна. Ардын намд төдийгүй төрд урхагшиж бүгшсан бузар булай бүхнийг энэ хүн сүхдэх бололтой. Хэрвээ Ерөнхий сайд нь нийгмийн захиалга юм бол Засгийн газар нь ч нийгмийн захиалгаар бүрдэх учиртай бүрдүүлэх ч ёстой. Олон нийтийн хүсэж шаардаж байгаа эхний зүйл бол огцруулах ажиллагаанд оройлон зүтгэсэн ойворгон гишүүдийг сайд болгохыг эсэргүүцэж байна. Ж.Энхбаяр, Т.Аюурсайхан, Ц.Гарамжав, Л.Оюун-Эрдэнэ нарыг ард түмэн хүлээж аваагүй. У.Хүрэлсүхийг захиалсан байж болох ч тэднийг яагаад ч захиалаагүй. Чухам үүн дээр өнөөх алдарт “эр хүн” гэдэг пиар нь үнэн эсэх нь мэдэгдэнэ. Огцруулахаар санал гаргасан гишүүд сайд болохгүй гэдгээ мэдэгдсэн. Гэхдээ энэ амлалт худлаа, “эх орон дуудаж байна, ард түмнийхээ төлөө” гээд нүүр нь улайхгүй зүтгэх гишүүд зөндөө бий. Түрүүчээсээ хэвлэлээр үгээ дайлгаад эхэллээ.

Харин тэднийг эр хүн шиг хэлсэн амлалтандаа хүр гээд сайд болгохгүй байх эр хүний чанар нь У.Хүрэлсүхээс гарах эсэх нь сонирхол татаж байна. Хэрвээ хувийн захиалга авдаг бол засагтаа оруулна, нийгмийн захиалгыг дагадаг  бол сайд болгохгүй. МАН мэргэшсэн Мэргэжлийн Засгийн газрыг нэгэнтээ байгуулж чадаагүй боллоо. Харин хоёрдахь удаагаа жинхэнэ утгаар нь байгуулж чадах эсэх нь одоо л харагдана.
 

НУУЦ.мн