Нууц мэдээллийн уурхай

Төмөр замд урхагшсан нэгэн том “зөрчлийг” Ж.Пунцаг даргын удирддаг чадварлаг ажилтнуудаас бүрдсэн Дотоод аудитын хяналтын алба илрүүлж шуугиан тарьжээ. Тус албаныхан ээлжит шалгалтаараа төмөр замын нэгэн хурган дарга албан бичиг төлөвлөж боловсруулахдаа монгол хэлний дүрмийн болон утга найруулгын ноцтой алдааг олонтоо гаргаж байсныг соргогоор олж илрүүлсэн байна. Аудитынхан нийлж суугаад үг үсэг, утга найруулгын алдаатай 20-30 тушаал байгааг олжээ. Тушаал бүрийн дүрмийн алдааг нэгбүрчилэн тоолоод нийт 15 удаа алдсаныг тогтоосон байна. Тэр дороо шуурхай хуралдаан зарлаж уг ноцтой зөрчлийг авч хэлэлцжээ. Шуурхайд суусан хуульч нь сахилгын зөрчил биш гэсэн ч аудитынхан авч хэлэлцсэнгүй. Харин ч ажлын хариуцлага алдсан зөрчил мөн хэмээн дүгнэжээ. Дүгнэлтээ гаргасан атал “зөрчил” гаргагчид танилцуулсангүй шууд Д.Жигжиднямаа дарга руугаа бариад гүйжээ. Бодвол аудитын шалгалтаар ноцтой зөрчил олныг илрүүлсэн тухайгаа тайлагнасан биз ... Замын дарга ч үг үсгийн алдааг том зөрчил хэмээн санал нэгтэй үзэж нөгөө даргын цалинг нь хасаж шийтгэсэн байна. Аудитын албыг албан тоот, тушаалын үг үсгийн алдааг хайх хэмжээнд сэтгэдэг дарга нар төмөр замд ажилладаг нь инээдтэй бас эмгэнэлтэй аж. Ж.Пунцаг нь дэд сайдын үүрэг гүйцэтгэгч Шилэн Цогоогийн найз. Дэд сайдын үүрэг гүйцэтгэгч их сайн ажилласан хэмээн магтуулж байгаа. Түүний адилаар найз нь ч төмөр замд урхашсан зөрчил дутагдлыг илрүүлэх тал дээр бас л сайн ажиллаж байна. Гэхдээ буруу газраа л шалгаад байгаа аж. Хэрвээ худалдан авах ажиллагааны газарт аудит хийвэл их юм гарч ирнэ хэмээн төмөр замчид нь ярьдаг. Бид энэ тухай удахгүй хүргэнэ.
 

НУУЦ.мн