Нууц мэдээллийн уурхай

МАН 2013 онд  М.Энхболдыг намын даргаараа сонгож байв. Тэгвэл МАН дөрвөн жилийн дараа  намын дарга, Ерөнхий сайд хэн байхыг тодруулах гэж байна. Дараагийн шинэ Ерөнхий сайдад У.Хүрэлсүх, Ө.Энхтүвшин, Н.Энхболд нар өрсөлдөж буй. Харин тэдний хэнийг нь дэмжихээ МАН-ын Удирдах зөвлөл шийдэж чадаагүй байна. Мэдээж Засгийн газраа тогтвортой байлгах, фракциудын эв нэгдлийг хангаж чадахуйц лидерийг намын дарга, Ерөнхий сайдаар тодруулахыг эрмэлзэж буй. Энэ эрмэлзлэлийг нь хэн хангаж чадах вэ гэдэг сонирхолтой асуулт.

Төрийн хүний зангарагтай, элдэв хэл аманд өртдөггүй, нэр цэвэр гэж тодорхойлж болох хүн бол Нямаагийн Энхболд. Тэрбээр 2013 онд намын их хурлаар намын даргад өрсөлдөж байсан нэгэн. Тухайн үед одоогийн дарга М.Энхболдын хүчтэй өрсөлдөгч байсан төдийгүй хоёр Энхболдын хэн нь намын дарга болох вэ гэх таамаг хэвлэлээр хөвөрч байв. Харин эцсийн мөчид Н.Энхболд нэрээ татаж, өрсөлдөөнд М.Энхболд, Т.Аюурсайхан нар тунан 91 хувийн саналаар М.Энхболд ялалт байгуулж байжээ.

Хүчтэй өрсөлдөгчийн нэг гэгдэж байсан Н.Энхболд сүүлийн мөчид нэрээ татсан нь нэгэн дээвэр дор, нэг зорилгын төлөө явсан анд нөхөртөө хүн чанар гаргасантай холбоотой байсан гэдэг. Намын их хурлын гурав дахь өдөр МАН-ын даргыг сонгох байсан ч М.Энхболдын аав, Монгол Улсын Ардын багш Г.Миеэгомбо таалал төгссөн мэдээ хүлээн авсан байдаг. Энэ үед намын даргад нэр дэвшээд байсан Н.Энхболд “УИХ-д цөөнх болсон намын удирдлага, намын сонгуультны ажлын хэцүүг бие сэтгэлээрээ мэдэрч яваа хүмүүсийн нэг нь би. Хариуцлагыг нь дэндүү сайн ойлгож байна. Гэвч би зүрхшээхгүй. Энэ намд хэрэгтэй ямар нэгэн зүйл, чанар, туршлага надад байгаа гэж журмын нөхөд маань үздэг бол би зүтгэхэд хэзээд бэлэн.

Энэ Их хурал эв нэгдлийн илэрхийлэл болох ёстой. Бусад улс төрийн хүчний зүрхэнд нь шар ус хуруулдаг бидний гол чанар бол манай намын бат цул эв нэгдэл. Бид бие биеэ хайрлахгүй бол хэн биднийг дэмжих юм бэ. Улс төрд шударга, цэвэр өрсөлдөөн хэрэгтэй. Гэхдээ улс төрд хүн чанар түүнээс ч илүү чухал. Би Намын даргын өрсөлдөөнд оролцоно гэдгээ зарласан. Гэвч надад хүн чанар, намын эв нэгдэл ямар ч албан тушаалаас үнэтэй. Энэ миний ажил, амьдралын зарчим, гүн итгэл үнэмшил. Ийм учраас би энэ өрсөлдөөнөөс нэрээ татаж байна” хэмээн мэдэгдэж байжээ.

Харин тэрбээр энэ удаа өрсөлдөөнд дахин орох гэж байна. Эв нэгдлийг бодож,  аавыгаа алдсан  намын нөхөртөө  хүн чанар гарган зайгаа тавьж өгсөн түүнд  намынх нь нөхөд энэ удаа боломж олгох болов уу. 
 
Б.Сондор