Нууц мэдээллийн уурхай

Урагвайгаас Италийн мафийн нэгэн том боссыг баривчилсан тухай Daily Mail -д мэдээлжээ. Италийн мафийн “Ндрангет” гэдэг хүчирхэг бүлэглэлийн нэгэн том толгойлогч Рокко Морабито нь цагтаа улсынхаа “хар тамхины хаан” гэгдэж явжээ. Түүний бүлэглэл хар тамхи оруулж ирдэг борлуулдаг маш нууц, сайтар зохион байгуулагдсан суваг сүлжээг байгуулсан. Цагдаагийнхан хар тамхины хааныг 1994 онд байрьж чадсан ч тэр жилдээ шоронгоос оргож бөөн шуугиан дэгдээсэн. Ингээд 23 жил мөрдлөгөөс нуугдаж яваад саяхан Урагвайгаас баригджээ. Рокко шоронгоос оргосон даруйдаа Италиас нууцаар гарч Урагвайд өөр хүний нэртэй паспортоор бүгжээ.

Эндээс бүлэглэлээ удирдан чиглүүлж байсан гэнэ. Хотын нийтийн тээврийн компанид засварчны даруухан ажил хийж бүр 2001 онд урагвай эмэгтэйтэй гэрлэн хоёр ч хүүхэдтэй болжээ. Харин нэг хүүхдээ сургуульд бүртгүүлэхдээ урагвай нэрээрээ биш харин өөрийн жинхэнэ овог болох Морабитойгоороо бүртгүүлсэн нь алдаа болжээ. Гэмт этгээдийг Өмнөд Америкт бүгсэнийг мэдсэн Италийн цагдаа энэ тивийн улсуудын хуулийн байгууллагатай хамтран ажиллаж байжээ. Энэ үед Морабито гэх овогтой хүүхэд гарч ирсэн нь Урагвайн цагдаагийн анхаарлыг татаж аавыг  нь нууц хяналтанд авсанаар Италийн хар тамхины хаан саяхан баригдсан байна.

Баригдах үед нь гэрээс нь Урагвай, Перу, Бразиль улсын таван иргэний үнэмлэх, гадаад паспорт, 13 гар утас, 20 гаруй см карт болон бэлнээр 50 мянган доллар гарч иржээ. Эх оронд нь хар тамхины хаанд 30 жилийн хорих ял эчнээгээр оноогоод байсан.  Түүнийг Италид шилжүүлэн өгөх гэнэ.
 

НУУЦ.мн