Нууц мэдээллийн уурхай

УИХ дахь МАН-ын бүлгийн дарга Д.Хаянхярваагаас дараахь тодруулгыг авлаа.

-Танай намын бүлэг хэзээ завсарлага авах шийдвэр гаргасан юм бэ?

-Завсарлага авахдаа тодорхой хэлсэн. Манай намын дотоод асуудал төрийн асуудал болчихлоо гэж. Бид бүлэг дотроо ярьж ойлголцох чиглэлд ажиллаж байна. Би ойлголцоно гэдэгт итгэлтэй байгаа. Өчигдөр бид бүлгээ хуралдуулах гэж хоёр удаа товлосон. Олонхи нь ирээд ирц бүрдсэн боловч нөгөө хэд маань орохгүй гээд ирээгүй. Гэхдээ олонхи байсан хэд нь өнөөдөр завсарлага авахаар шийдсэн юм. Засгийн газрыг огцруулах алхам яагаад ингэж хурдсав гэдэг нь Ерөнхий сайд, Шадар сайд хоёрын зөрчлөөс эхэлсэн. Тиймээс энэ асуудлыг нэг талд нь гаргах ёстой гэж үзэж байгаа. Ийм учраас Тусгай хяналтын дэд хороо хуралдаж энэ асуудалтай холбоотой мэдээллийг сонсох нь зүйтэй. АТГ-аас энэ асуудлыг прокурорт шилжүүлчихсэн гэсэн учраас гүйцэтгэх ажиллагаа нь дуусчихсан юм байна гэж ойлгосон. Тиймээс энэ мэдээллийг сонсохын тулд завсарлага авсан юм.

-Таныг УИХ-ын чуулганы хуралдааны дэгийн тухай хууль зөрчиж завсарлага авлаа гэх шүүмжлэл гарлаа. Энэ талаар юу хэлэх вэ?

-Ямар нэгэн хууль зөрчөөгүй гэж бодож байна. Яагаад гэвэл, бүлгийн шийдвэр гэж олонхиороо гаргасан шийдвэрийг хэлнэ.

-Засгийн газрыг огцруулах саналыг хуулийн хугацаанд нь хэлэлцэж амжих болов уу?

-Амжуулж таарна. Өнөөдөр Тусгай хяналтын дэд хороо хуралдчихвал хүлээгээд байх зүйлгүй болно.

-Хуулийн хугацаа нь өнөөдөр дуусна, маргааш дуусна гэсэн хоёр өөр тайлбар яваад байх юм. Хэзээ дуусах вэ?

-Хуулийн хугацаа нь маргааш дуусна.  

NUUTS.mn