Нууц мэдээллийн уурхай

Өчигдөр МАН-ын бүлгийн хурал ордны зүүн жигүүрт хамгаалалт зогсоож байгаад хуралдлаа. Хамгаалалт тавигдахыг бодоход хурал ширүүхэн явагдах төлөвтэй байсан. Өмнө нь хурал хаяж явдаг У.Хүрэлсүх эсрэг талаа хурлаас зугтахад хүргэх байх гэсэн хүлээлт гарсан. Ерөнхийдөө түүний талын ялалтаар бүлгийн хурал дуусах байх гэж яригдаж байлаа. Ердөө өглөө нь тэрээр “Төр мафижиж нам компанижлаа” хэмээн гал дөлтэй ярилцлага өгч байлаа. Энэ эрчээрээ явсаар ирэх сард болох намын Их хуралд намын даргын төлөө өрсөлдөхөө мэдэгдсэн. Гэсэн ч тэрээр бүлгийн хуралд ороод л зөөлөрчээ. Зөөлрөх зөөлрөхдөө өөрийх нь хамгийн том шүүмжлэгч эсэргүүцэгч болоод байгаа Н.Номтойбаяртай тэврэлдэх хэмжээнд хүртэл зөөлөрчээ.

Тэр хоёр Д.Лүндээжанцан гишүүний өрөөнөөс мөрөөрөө тэврэлдэх шахам гарч ирсэн нь хэвлэлийхний хараанд өртсөн байна. Уг нь тэврэлдэх нь бүү хэл барилцаж авахдаа тулахаар үзэлцэж байсан ч хоёр ч ийнхүү “эвлэрчээ”. Толгойлогч нь ийнхүү “зөөлөрч” байгаа нь бүлэгт нь барьц алдаж түгшүүр болгоомжлол төрүүлжээ. Энэ нь засаг огцруулах бичигт гарын үсэг зурсандаа эргэлзэж явсан зарим нэг гишүүдийн “толгойн эргээ”-г бүр лавшруулжээ. Хэрэг явдал төсөөлж байснаас буруугаар эргэвэл цохилт У.Хүрэлсүх дээр буухгүй нь ийнхүү тодорхой болжээ. Түүний оронд Т.Аюурсайхан, Д. Амарбаясгалан, , Л.Оюун-Эрдэнэ нарын нэг нь намаасаа том жавтий хүртсэнээр энэ хэрэг  дуусна.

Харин Т.Гантулга, Ц.Сандуйн хувьд асуудал нэгэнт шийдэгдсэн байна. Өчигдрийн хурлын нэг нэг сэнсааци нь “шударга үнэний туйл” Ц.Нямдорж засаг огцруулах бичигт зарлаж байгаад гарын үсгээ зурсан явдал байв. Тэрээр улстөрийн шуугиан бүрээс өөртөө улстөрийн ашиг унагаж чаддаг.  Улстөрийг бужигнуулсан сенсааций шуугиан бүрийг тэсэн ядан хүлээж явдаг. Эрдэнэтийн 49 хувь дээр өнгөрсөн өвөлжин тоглолт хийсэн ч хүү Анхбаярых нь шахааны баримт илэрч овоо өссөн нэр хүнд нь эргээд байдаг л байрандаа унасан. Үнэндээ энэ тухай анх дуугарсан хүн нь О.Баасанхүү гишүүн байсан ч түүнээс “зохиогчийн эрхийг” нь Ц.Нямдорж шууд  дээрэмдчихсэн. Энэ удаад ч гэсэн тийм явдал болж байна. У.Хүрэлсүх бужигнуулсаны хүчинд 60 тэрбумын хэрэг улам ч өндөр авсан. Гэтэл мань  эр эргэж буцаж магадгүйг гярхай ажигласан байна.  Ингээд тэр дор нь засаг огцруулах бичигт гарын үсэг зурж 60 тэрбумын эсрэг тэмцлийн нэгэн удирдагч болох боломжийг өөртөө нээж өгчээ.

 

NUUTS.mn