Нууц мэдээллийн уурхай

НИТХ дахь АН-ын бүлгээс НИТХ-ын дарга Ц.Сандуйг үүрэгт ажлаас нь чөлөөлөх тухай асуудлаар мэдээлэл хийлээ.  МАН-ын Ерөнхий нарийн бичгийн дарга Д.Амарбаясгалан болон зарим тус намын зарим гишүүн 60 тэрбумын бичлэг нь эвлүүлэг биш гэдгийг хүлээн зөвшөөрсөн мэдээлэл хийсэн билээ. Тус бичлэгт байлцаж, "60 тэрбум"-ын талаар ярилцаж буй Ц.Сандуйг МАН-ын удирдлагууд өмгөөлөн хамгаалж байна гэж НИТХ дахь АН-ын бүлэг үзэж, түүнийг огцруулах ёстой хэмээн үзэж өргөх бичиг барьж байгааг дэмжинэ гэв. Түүнчлэн "МАН-ын удирдлагууд Ц.Сандуйг өмгөөлж байна. Төрийн албыг наймаалцан, 60 тэрбум төгрөг босгож буй МАН-ын удирдлагуудын хэрээс хэтэрсэн үйлдлийг эсэргүүцэж байна. Төрийн албаны чадавхийг бууруулсан, чадварлаг төрийн албан хаагчийн эрхийг ноцтой зөрчсөн, албан тушаал, эрх мэдлийн арилжааг хөхиүлэн дэмжсэн, авлигын нууц сүлжээ санаачилсан, төрийн эрх мэдлийг Үндсэн хуулийн бус аргаар авахыг санаархсан, маш ноцтой гэмт хэргийн шинжтэй, ёс зүйгүй үйлдэл мөн. Гэтэл МАН-ын удирдлагууд эрх бүхий гишүүддээ хариуцлага тооцох биш хаацайлж байна. Иймд НИТХ дахь АН-ын бүлгээс НИТХ-ын хуралдаанаар НИТХ-ын дарга Ц.Сандуйг үүрэгт ажлаас нь чөлөөлөх ёстой" гэв.

НИТХ дахь АН-ын бүлгийн дарга Ц.Баатархүү “2016 оны долдугаар сарын 6-ны НИТХ-ын анхдугаар чуулганд АН-ын бүлгийн 11 төлөөлөгч удаа дараа НИТХ-ын дарга Ц.Сандуйгаас албан ёсоор тодруулга авч байсан. Тэгэхэд Ц.Сандуй “Энэ бол худал гүтгэлэг, эвлүүлэг. Хэрэв үнэн болох нь нотлогдвол ёсзүйн хариуцлага хүлээж, НИТХ-ын даргаасаа татгалзана” гэж мэдэгдэж байсан. Тиймээс одоо татгалзах ёстой" гэсэн юм. НИТХ-ын дарга Ц.Сандуйг огцруулах албан бичигт МАН-ын 16 төлөөлөгч гарын үсэг зурсны дээр АН-ын 11 төлөөлөгч нэмэгдэж, нийт 27 гарын үсэг цугларчээ.

NUUTS.mn