Нууц мэдээллийн уурхай

Энэ явдал Иллинойс мужид болжээ. Нэгэн ганц бие эмэгтэйн 11 настай хүү Фил нь сургууль дээрээ байнга дээрэлхүүлж доромжлуулж гадуурхагддаг байжээ. Дээрэлхдэг хүүхдүүд нь нэг ангийнхнаас нь гадна өөр ангийхан ч байсан аж. Зарим үед бүр зодуулдаг болохыг хүүгийн хөхөрсөн биеийг хараад ээж нь олж мэджээ. Тэрээр сургуулийн захиргаа, ангийн багшид нь хандсан ч байдал өөрчлөгдсөнгүй. Харин ч улам их дээрэлхүүлэх болсон гэнэ. Энэхүү байнгийн дарамтаас болж хүү нь сургуульдаа явах дургүй болсон тул сүүлдээ амиа хорлож ч магадгүй гэж ээж нь эмээжээ. Ганц бие түүнд хүүг нь өмгөөлөх хамгаалах хамаатан садан байсангүй. Гэхдээ Брент Ворфилд гэдэг байкер найзтай байсан тул түүнд зовлонгоо хэлжээ.

Орон нутгийн байкеруудын нэгэн клубын тэргүүн тэрээр өөрөө сургуульд байхдаа зодуулж дээрэлхүүлдэг байсан тул хүүд туслахаар шийдсэн байна. Ингээд клубын гишүүдээ цуглуулан хэрхэн туслах талаар зөвлөлджээ.

Тэд хүүг дээрэлхдэг хөвгүүдийг хашраахын оронд өмгөөлж хамгаалах хүмүүстэй гэдгийг тэдэнд мэдрүүлэхээр шийджээ. Ийнхүү хүүг өглөө хичээлдээ явахад нь 50 мотоцикльчдоос бүрдсэн цуваа дагалджээ.

Фил цувааны ахлагч Брентийн мотоцильд сундалдаж явжээ.

Сүрт цувааг сургууль дээр ирэхэд жинхэнэ шуугиан дэгдсэн байсан. Мундаг мотоцикльтой, том биетэй байкерууд хүүхдүүдэд ялангуяа Филийг дээрэлхдэг хөвгүүдэд хүчтэй сэтгэгдэл төрүүлжээ. Тэр өдрөөс хойш хүүг хэн ч дээрэлхээгүй гэнэ.

Байкеруудын клуб ганц бие ээжид нь туслахын тулд хүүгийх нь бүтэн жилийн хичээлийн хэрэглэлийн зардлыг дааж авчээ. Байкеуудын энэ ажил мужийн боловсролын газрынханд үнэлэгджээ. Тэд сургуулиудад гардаг хүүхдүүдийн нэгнийгээ дээрэлхэх явдалтай тэмцэхийн тулд мотоцикльчдын хамгаалалтын сүрт цувааг ашиглах талаар хамтран ажиллахаар болсон гэнэ.
 

NUUTS.mn