Нууц мэдээллийн уурхай

Жил гаруйн өмнөөс 50 настай гэхэд гайхалтай биетэй саятан эр тансаг хөлөг онгоц дээрээ залуу бүсгүйчүүдтэй бүжиглэж байгаа зураг дэлхийн цахимаар тарж шуугиан дэгдээсэн. Эрчүүд мэдээж саятанд, хүүхнүүд тэрхүү бүсгүйчүүдэд атаархсан. Энэ бол итали саятан, IMA группийн эзэн Жанлуки Вакки юм. Тэрээр 50 насандаа баймгүй биетэй, чадварлаг бүжиглэдэг, алиа хошин зантайн дээр маш их мөнгөтэй, тансаг хөлөг онгоц орд харштай байсан тул бүсгүйчүүд нүдэнд өртөх гэж өмнүүр эргэлддэг байжээ. Хөлөг онгоц дээр нь зугаа цэнгээн, үдэшлэг тасардаггүй. Тийм нэгэн үдэшлэгийн зураг нь цахимаар цацагдсаны дараа Истаграмм дахь дагагчдын тоо нь бүр 12 саяд хүрсэн.

Итали саятан тансаглаж чаддаг, наргиж чаддаг жинхэнэ шоучин эр гэнэ. Дээр нь мөнгөөр бялхаж байдаг. Гэтэл саятан эр хамаг мөнгөө зугаа цэнгэлд өгөөд дууссан нь саяхан илж болжээ. Өдгөө түүний хаус,эдлэн, усан онгоцыг нь шүүхийн шийдвэр гүйцэтгэлийнхэн “Banco BPM” банкны нэхэмжлэлээр битүүмжлэн лацаджээ.

Саятан зөвхөн энэ банкинд л гэхэд 10 сая еврогийн өртэй гэнэ. Удалгүй саятны тасралтгүй зугаа цэнгэлийн цаана санхүүгийн маш хүнд асуудлууд нь нуугдаж байсан нь илэрчээ. “IMA” групп нь нийтдээ 30 сая еврогийн өрөнд орсоноос удаан хугацааны турш төлсөөр 10 сая хүртэл бууруулж чаджээ.

Гэтэл энэ хэмжээнд хүргээд л итали саятан зээлээ төлөхөө байж харин мөнгөөрөө наргиж цэнгэж зугаалж гарчээ. 10 саяын өр нь төлөгдөөгүй байхад Порто Черво гэдэг амралтын бүсэд таван сая еврогийн үнэтэй эдлэнг зээлээр худалдан авч шоуны ордон болгожээ. Группийнхээ орлогоор наргисаар байгаад дуусмагц сүүлдээ хамаатнуудаасаа мөнгө зээлж эхэлсэн байна.

Өнгөрсөн хавар нагац нь болох Марко, Альберто нараас 360 мянган евро зээлээд тэр мөнгөөрөө нисдэг тэрэг түрээслэн бүсгүйчүүдтэй нисэж зугаацаад дуусгасан тухай Италийн цахимд бичжээ. Өдгөө түүний нийт өр нь 30 сая евро хүрсэн гэнэ.  Гэтэл байгаа хөрөнгө нь 18 сая еврод хүрэхтэй үгүйтэй үлджээ.

НУУЦ.мн