Нууц мэдээллийн уурхай

Америкийн армид эрэлхэгээр хүчин зүтгэсэн Сина дуудлагат лабрадор нохой нь мэргэжлийн сапёрчин юм. Тэрээр Афганистанд гурван ч удаа 12-24 сараар томилогдон очиж сапёрын ангид алба хаажээ. Түүний илрүүлсэн мина тэсрэх бөмбөгний тоо нь 100 хүрч олон арван цэргийн амийг аварчээ. 2014 онд насны хязгаарт хүрч цэргээс халагдан “тэтгэвэрд” гарчээ. Түүний хоол арчилгаа, эмнэлгийн үзлэгний зардалд зохих хэмжээний тэтгэвэр олгож иржээ. Тэтгэвэрдээ гараад Мичиган мужийн Маскегон хотд өөрийн дайчин анд, тэнгисийн явган цэргийн түрүүч  Жефф де Янгийн гэрт амьдрах болжээ.

Гэтэл өнгөрсөн сарын эхээр хийсэн ээлжит эмнэлгийн үзлэгээр Сина ясны хорт хавдар туссан болох нь илэрчээ. Нууцлаг явагдсан аймшигт өвчин хүнд үедээ орсон тул эмч нар үүрд нойрсуулах тариа хийхийг зөвлөсөн байна. Нас нь ч 12 хүрч өндөр болсон тул энэ нь зөв шийдвэр гэж тайлбарлажээ. Ингээд хотын цэргийн штабаас эдгэрэшгүй өвчин туссан ахмад дайчныг эцийн замд нь үдэх ёслол зохион байгуулжээ. Олон цэргийн амийг аварсан сапёрчин нохойтой салах ёс хийхээр ахмад дайчин, цэргийнхэн болон хотынхон бүгд иржээ.

Бүх хүмүүс Синаг тэвэрч үнсэн салах ёс хийжээ. Жагсаалын эхэнд ёслолын дүрэмт хувцсаа өмссөн Синаг авч явжээ.

Түүнийг хотын цэргийн музейны USS LST-393 байлдааны усанд онгоцонд хүргэж тэнд үүрд нойрсуулах тариад цэргийн ёсоор оршуулжээ.

Оршуулгын үеэр хүндэт харуул жагсаж гурвантаа бууджээ. Булшин дээр нь дайчин нөхөр Жефф нь ийн хэлжээ.

-Тэрээр Афганы аюул ослоор дүүрэн зам нугачаа хавцалд 100 гаруй удаа мина, тэсрэх бөмбөг илрүүлж олон цэргийн амийг аварсан. Тэсрэх бөмбөг исгэрэх суман дор бидэнтэй хамт тулалдсан.  Өндөр уулын хүйтэн шөнө би Синаг тэвэрч дулаацдаг байсан-

NUUTS.mn